Portali “kosova-sot.info” ka publikuar një artikull me titull “Në një shkrim të bazuar në të dhënat zyrtare, revista Monitor theksonte se ‘në vitin 2020 kanë humbur jetën në vend rreth 28 mijë persona, sipas të dhënave zyrtare të Drejtorisë së Gjendjes Civile’”.
Pas analizës së kontrollit të fakteve nga hibrid.info, del që ngjarja ka të bëjë me shtetin e Shqipërisë, ndërsa portali nga Kosova “kosova-sot.info” në titullin e saj nuk tregon se për cilin shtet bëhet fjalë. Gjithashtu, ky medium online ka përdorur një fotografi që nuk përputhet me përmbajtjen, pasi në të shihen policë kosovarë.
Ky artikull me titull përgjithësues dhe fotografi jo qartësuese, lë të kuptohet se lajmi ka të bëjë me Kosovën, duke e ditur që ky portal (kosova-sot.info) është i regjistruar në Kosovë dhe pjesën dërmuese të audiencës në rrjetet sociale i ka kosovarë.
Pjesë nga teksti i artikullit të publikuar në “kosova-sot.info”:
Fshehja e vdekjeve nga Covid/ Shifrat që nxjerrin bllof propagandën e qeverisë
Për ditë e më shumë dalin në dritë prova dhe argumenta të reja se qeveria shqiptare ka manipuluar dhe fshehur numrin e të vdekurve nga pandemia. Debati që u hap në fillim të nëntorit se nga marsi deri në tetor, Covid 19 nuk kishte shkaktuar 550 vdekje por dyfishin e tyre tani po bëhet më i prekshëm. Dhe për këtë nuk nuk dëshmojnë vetëm çertifikatat mortore të atyre që kanë humbur jetën në spitalein infektiv, dhe nuk janë regjistruar si viktima të pandemisë. Por të njëjtën gjë e konfirmon edhe shtimi gapopant i numrit të vdekjeve për vitin 2020, i vili u rrit me 6 mijë persona më shumë në raport me mesataretn e viteve të fundit.
Vegëza e artikullit të publikuar në “kosova-sot.info”:
Analiza:
“Kosova-sot.info” ka përdorur një lajm që ka të bëjë me shtetin e Shqipërisë. Në titullin e këtij artikulli qartësohet lajmin dhe vendndodhjen, si dhe ka përdorur një fotografi ku shihen mjekë dhe pjesëtarë të policisë së Kosovës. Pas verifikimit nga hibrid.info, del që ky artikull kategorizohet si “clickbait”.
Arsyetimi:
Clickbait – “Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
