Faqja në Facebook me emrin “Kopshte me lumturi” ka publikuar me datë 27 tetor një video-material me mbishkrimin “Lutuni për vëllezërit tuaj në Gaza!”.
Pamjet shfaqin flakë të kuqe dhe fishekzjarre që lëshohen nga çatitë e ndërtesave.
Pas verifikimit të fakteve të kryer nga hibrid.info, është vërtetuar se pamjet janë realizuar në Algjeri dhe nuk paraqesin konfliktin aktual në Gaza ndërmjet Hamasit dhe Izraelit.
Vegëza e postimit të publikuar në Facebook nga faqja “Kopshte me lumturi”:
https://www.facebook.com/watch/?v=248116281239664
Pas hulumtimit të kryer përmes programit të automatizuar “InVID”, hibrid.info ka arritur të vërtetojë se pamjet paraqesin festën e tifozëve të klubit futbollistik nga Algjeria, CR Belouizdad, në korrik të këtij viti. (shih këtu)
Duke kërkuar me akronimin e këtij klubi futbollistik “CRB”, hibrid.info ka arritur të gjejë video-materialin e njëjtë të publikuar në Youtube me datë 16 korrik. (shih këtu)
Analiza:
Pas verifikimit të fakteve, hibrid.info ka vërtetuar se faqja në Facebook “Kopshte me lumturi” ka publikuar një video-material nga festa e tifozëve të klubit algjerian “CR Belouzidad” me pretendimin se e njëjta është realizuar gjatë konfliktit aktual në Gaza.
Bazuar në metodologjinë e punës, hibrid.info e vlerëson këtë postim si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
