Përmes një postimi të publikuar në Facebook nga faqja “SkenderajLive” pretendohet se Ambasada e Shteteve të Bashkuara të Amerikës në Prishtinë u ka bërë thirrje qytetarëve që të kufizojnë lëvizjet dhe të mos i dërgojnë fëmijët në shkollë më 16 shtator.
Çka nuk shkon me pretendimin?
Pas verifikimit të fakteve të kryer nga hibrid.info, u vërtetua se pretendimi është i manipuluar.
Ambasada e SHBA-së në Prishtinë ka publikuar një njoftim për demonstrata të planifikuara për të mërkurën, më 16 shtator 2026, në qendër të Prishtinës dhe në qytete të tjera të mëdha në Kosovë.
Në njoftim thuhet se këto demonstrata mund të shkaktojnë grumbullime të mëdha, mbyllje të rrugëve dhe pengesa të mëdha në trafik. Për këtë arsye, qytetarëve u rekomandohet të shmangin zonat ku zhvillohen demonstratat, të tregojnë kujdes në rast se ndodhen pranë grumbullimeve të mëdha dhe të jenë të vëmendshëm ndaj situatës përreth.
Ambasada gjithashtu këshillon që të kufizohet udhëtimi në zonën e afërt të vendbanimit dhe të shmangen udhëtimet drejt vendit të punës apo shkollave, nëse rruga kalon nëpër zonat e prekura, pasi mund të ketë vështirësi në qarkullim.
Megjithatë, pjesa e pretendimit se qytetarëve u është bërë thirrje që të mos i dërgojnë fëmijët në shkollë është paraqitur pa kontekst.
Në njoftimin e Ambasadës thuhet se personeli i Qeverisë së SHBA-së është këshilluar të shmangë të gjitha udhëtimet e panevojshme në afërsi të demonstratave dhe të mos i dërgojë fëmijët në shkollë më 16 shtator, për shkak të mundësisë së pengesave në trafik.
Pra, kjo pjesë e njoftimit nuk paraqet një thirrje të përgjithshme të Ambasadës së SHBA-së për të gjithë prindërit në Kosovë që të mos i dërgojnë fëmijët në shkollë.
Më 16 shtator pritet të shpallet aktgjykimi në rastin ndaj Hashim Thaçit, Kadri Veselit, Rexhep Selimit dhe Jakup Krasniqit në Dhomat e Specializuara të Kosovës në Hagë (shih këtu).
Analiza
Përmes një postimi në Facebook pretendohet se Ambasada e SHBA-së në Prishtinë u ka bërë thirrje qytetarëve që të kufizojnë lëvizjet dhe të mos i dërgojnë fëmijët në shkollë më 16 shtator.
Pas verifikimit të fakteve u vërtetua se kjo ambasadë ka paralajmëruar për demonstrata dhe pengesa të mundshme në trafik, por këshilla për të mos i dërguar fëmijët në shkollë u është dhënë personelit të Qeverisë së SHBA-së, jo në mënyrë të përgjithshme qytetarëve të Kosovës.
Bazuar në metodologjinë e punës, hibrid.info e vlerëson këtë përmbajtje si “Manipulim i fakteve”.
Arsyetimi
Vlerësimin si “Manipulim i fakteve” marrin ato përmbajtje informative që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.