Artikulli me titull “Çavuşoğlu: Nuk kam takuar ministreshë më të aftë se Donika Gërvalla” është publikuar nga portali i dyshimtë në gjuhën shqipe “onlinenews54.com”.
Pas kontrollit të fakteve të kryer nga hibrid.info, del që titulli i këtij artikulli është i sajuar dhe i njëjti nuk përputhet fare me përmbajtjen në tekst.
Gjithashtu, lajmi është i vjetër, i publikuar më 18 qershor të këtij viti dhe ka të bëjë me takimin që ministrja e Punëve të Jashtme dhe Diasporës, Donika Gërvalla, kishte zhvilluar me homologun e saj turk, Mevlyt Çavushollu, në margjina të Forumit të Procesit të Bashkëpunimit të Evropës Juglindore (SEECP), i cili është mbajtur në Antalia të Turqisë.
Në njoftimin nga ky takim në asnjë rast nuk përmendet se Çavushollu ka thënë se “Nuk kam takuar ministresh më të aftë se Donika Gërvalla”, siç pretendohet rrejshëm në titullin e këtij artikulli.
Vegëza e artikullit të publikuar në portalin e dyshimtë “onlinenews54.com”:
Pretendimi i bërë në këtë artikull, hedhet poshtë edhe nga vetë komunikata për njoftim e ministres Gërvalla, e publikuar atëkohë në ueb-faqen zyrtare të MPJD-së.
Në njoftimin e Ministrisë së Punëve të Jashtme dhe Diasporës shkruan se “në takim u bisedua rreth zhvillimeve politike në rajon dhe ministrja Gërvalla ka theksuar prioritetet e qeverisë së re të Kosovës dhe politikës së jashtme. Palët kanë theksuar nevojën për thellim të bashkëpunimit ekonomik, e posaçërisht për shkëmbimet tregtare dhe investimet direkte”.
Më poshtë mund të gjeni vegzën e njoftimit të publikuar në uebfaqen zyrtare të MPJD-së:
https://www.mfa-ks.net/single_lajmi/4403
Analiza:
Ky portal i dyshimtë ka publikuar një lajm të vjetër të cilin e ka publikuar me pretendimin ta paraqesë si aktual, duke i vënë titull të rremë.
Pas analizës së kontrollit të fakteve të kryer nga hibrid.info, ky artikull merr vlerësimin si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
