“Ligji për Gjykatën Speciale është iniciuar nga PDK-ja, por është shkruar nga ekspertët amerikanë. Gjykata Kushtetuese e Speciales normalisht që do ta rrëzojë, sepse ata nuk ia ndërpresin vetes as punën, as pagat. E rëndësishme është që Gjykata Kushtetuese e Kosovës të mos e rrëzojë. Ky ligj i shërben historisë së Kosovës dhe është e vetmja kartë që Kosova e ka në duar. BE-ja është alarmuar, sepse e di efektin!”
Kështu po pretendohet të ketë deklaruar Paul Williams, ish-këshilltari ligjor i delegacionit të Kosovës gjatë negociatave në Rambuje.
Përmbajtja me këtë pretendim është publikuar të premten (9 tetor) në Facebook, në grupin publik me emrin “LIRIA KA EMËR” nga një llogari anonime.
Cila është e vërteta?
Nuk ka faktë që vërtetojnë se Williams ka bërë një deklaratë tillë publike.
Deri në momentin e trajtimit, përmbajtja ka marrë mbi 270 reagime dhe ka afër 50 shpërndarje. Përmbajtja është ndarë në një grup që ka mbi 7 mijë anëtarë.
Rezultatet nga hulumtimi i origjinës së imazhit, përmes veglës “Google Lens”, shfaqën disa imazhe me deklarime të William, duke përfshirë edhe të tilla, ku komentohej aktgjykmi i Dhomave të Specializuara në Hagë ndaj ish-krerëve të UÇK-së (shih këtu).
Ndërsa kërkimi për llogaritë personale të Williams, ku do të mund të hulumtoheshin deklaratata e tij nuk rezultoi efektiv (shih këtu dhe këtu).
Më pas u hulumtua në makinën e kërkimit “Google”, drejtpërdrejtë deklarata dhe deklarimet e mundshme të profesorit Williams (shih këtu dhe këtu).
Por, rezultatet nuk shfaqën asnjë konfirmim për pretendimin që po trajtohet.
Williams ishte dëshmitari i dytë i mbrojtjes të ish-presidentit të Kosovës, Hashim Thaçi, në gjykimin ku ai akuzohej për krime lufte dhe krime kundër njerëzimit, procesi i cili përfundoi me shpalljen fajtor të Thaçit për krime lufte, në aktgjykimin e shkallës së parë së Dhomave të Specializuara.
Ai pas shpalljes së vendimin, në një prononcim në emisionin televiziv Opinion, ka shprehur publikisht pakënaqësinë e tij me këtë vendim (shih këtu).
Analiza:
Pretendimi se Paul Williams, ish-këshilltari ligjor i delegacionit të Kosovës gjatë negociatave në Rambuje, ka deklaruar se ligji për Gjykatën Speciale i shërben historisë së Kosovës dhe se Bashkimi Evropian është alarmuar për efektet e tij, nuk është i konfirmuar.
Gjatë kërkimit për origjinën e imazhit përmes “Google Lens”, u gjetën imazhe të Williamsit në të cilat ai komentonte zhvillimet lidhur me Gjykatën Speciale, por nuk u gjet konfirmim për deklaratën e pretenduar.
Po ashtu, kërkimi i drejtpërdrejtë i deklaratës në “Google” nuk ka gjetur burime që konfirmojnë se Williams e ka bërë këtë deklarim publik.
Andaj, bazuar në metodologjinë e punës, Hibrid.info e vlerëson këtë përmbajtje si “Lajm i rremë”.
Arsyetimi
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.