Rusia ka sulmuar Gjermaninë më shumë se çdo vend tjetër në Bashkimin Evropian në përpjekjet e saj të dezinformimit, thuhet në një raport i ri nga blloku 27-anëtarësh.
“Asnjë vend tjetër anëtar i BE-së nuk po sulmohet më me shunë sesa Gjermania“, thotë raporti i botuar më 9 mars nga shërbimi diplomatik i BE-së në Bruksel.
Raporti thotë se “fushatat sistematike” janë krijuar nga niveli politik dhe përmes mediave të afërta me pushtetin në Rusi.
Zëdhënësja e Ministrisë së Jashtme të Rusisë, Maria Zakharova, hodhi poshtë këto pohime të BE-së, duke i quajtur ato “qesharake”.
Raporti vjen pas akuzave të Shteteve të Bashkuara drejtuar Rusisë për një fushatë të koordinuar dezinformimi të krijuar për të minuar besimin në vaksinat e virusit Korona në SHBA dhe shtetet perëndimore.
BE thotë se që nga fundi i vitit 2015, më shumë se 700 raste me dezinformime të tilla janë mbledhur në Gjermani në bazën e të dhënave “EU vs Disinfo”.
Edhe Franca ishte shënjestër me më shumë se 300 raste, pasuar nga Italia me rreth 170 raste, thuhet ndër të tjera në këtë raport të BE-së.
“Kremlini është duke e krijuar një imazh për Gjermaninë duke pretenduar ta paraqes një realitet se në këtë vend ka zëra të konsiderueshëm që promovojnë ‘Rusofobinë’ irracionale”, thuhet në raport.
Duke përshkruar gjetjet e raportit si “jo të habitshme”, Ministri i Jashtëm gjerman Heiko Maas tha se zhvillimi i lidhjeve midis shoqërisë civile në Gjermani dhe Rusi do të ndihmonte që informacioni i rremë për vendin e tij të binte në vesh të shurdhër.