Portali i dyshimtë me përmbajtje në gjuhën shqipe “On27.net” ka publikuar një artikull me titull “Lajmi i Fundit na vjen nga veгiu i Kosoves , kjo gje e гende po ndodh atje tash!”.
Pas verifikimit të fakteve, hibrid.info ka vërtetuar se titulli është tendencioz dhe nuk i përgjigjet përmbajtjes.
Në përmbajtje gjendet lajmi për bllokimin e stacionit policor në veri të Mitrovicës nga rreth 80 punëtorë të komunës paralele në këtë pjesë të qytetit. Këtë veprim këta punëtorë e kishin bërë në shenjë revolte kundër arrestimit të kolegut të tyre nga ana e policisë.
Gjithashtu, edhe fotografia e përdorur në këtë artikull është tendencioze, në të cilën shihen pjesëtarë të Policisë së Kosovës dhe disa vetura.
Pas hulumtimit përmes programit te automatizuar online “InVID” për kontroll faktesh, hibrid.info ka arritur të vërtetojë se kjo fotografi është e vitit 2017, dhe i përket ngjarjes së asaj kohe, kur Policia e Kosovës kishte marr aksion për ndaljen e trenit të ardhur nga Serbia, pasi kjo e fundit provoi të vërë në funksion një linjë ilegale hekurudhore që do të lidhte Serbinë me veriun e Kosovës, pa lejen e Prishtinës zyrtare.
Pjesë nga artikulli i publikuar në portalin e dyshimtë “On27.net”:
Lajmi i Fundit na vjen nga veгiu i Kosoves , kjo gje e гende po ndodh atje tash!
Rreth 80 punëtorë të komunës paralele në veri të Mitrovicës, të ndarë në grupe, kanë bllokuar sot stacionin e policisë së Kosovës në veri të qytetit, duke mbyllur të dyja dyert kryesore të saj dhe duke pamundësuar kështu hyrje daljet në stacion.
Vegëza e artikullit të publikuar në portalin e dyshimtë “On27.net”:
Pas hulumtimit të kryer përmes makinave online të kërkimit, hibrid.info ka arritur të gjejë artikullin autentik të publikuar nga “KosovaPress.com”, i cili është marrë nga portali i dyshimtë “On27.net” dhe i është ndryshuar titulli dhe fotografia. (shih këtu)
Ndërsa, sa i përket imazhit të përdorur në këtë artikull, hibrid.info ka arritur ta gjejë fotografinë autentike të publikuar nga mediumi “Radio Evropa e Lirë”, i cili kishte të bëjë me ngjarjen e lartcekur të vitit 2017. Kjo fotografi është realizuar nga Amra Zejneli. (shih këtu)
Analiza:
Portali i dyshimtë “On27.net” ka publikuar një artikull të cilit i ka vënë titull dhe fotografi jo adekuate, duke pretenduar se një gjë e rëndë po ndodh në veri të Kosovës.
Pas analizës së kontrollit të fakteve bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
