Portali i dyshimtë me përmbajtje në gjuhën shqipe “on27.net” dje (27 gusht) ka publikuar një artikull me titull “EKSKLUZIVE: Dickɑ po ndodh ne veri , niset urgjentisht EULEX-i”.
Pas verifikimit të fakteve, hibrid.info ka vërtetuar se titulli i këtij artikulli është tendencioz, i cili nuk i përgjigjet përmbajtjes.
Në përmbajtje thuhet se njësiteve të KFOR-it, në patrullimet e tyre në veri të Kosovës, i është bashkuar edhe misioni i EULEX-it, për të mundësuar reagimin e shpejtë në rast të ndonjë eskalimi të mundshëm të situatës.
Por, nga hulumtimi i bërë nga hibrid.info për zhvillimet në veri të Kosovës, shihet se aktualisht nuk është duke ndodhur asgjë pazakontë.
Vegëza e artikullit të publikuar në portalin e dyshimtë “on27.net”:
Ky artikull me titull të sajuar është shpërndarë edhe në Facebook nga faqet “Post Lajme” (mbi 16 mijë ndjekës) dhe “Post Lajmee” (mbi 90 mijë ndjekës).
Pas hulumtimit të kryer përmes makinave online të kërkimit, hibrid.info ka arritur të gjejë artikullin autentik të publikuar në portalin e televizionit Dukagjini, “dukagjini.com”. KFOR-i në një përgjigje me shkrim për këtë televizion ka bërë të ditur se këto masa janë marrë për të mundësuar reagimin e shpejtë në rast të ndonjë eskalimi të mundshëm të situatës.
“Për të rritur ndërgjegjësimin e situatës, ajo ka rritur praninë e saj në afërsi të pikave të kalimit JARINJE dhe BRNJAK, ka ngritur disa pika të kontrollit të trafikut dhe ka rritur patrullimin në zonë së bashku me personelin e Njësisë së Specializuar Shumëkombëshe Karabiniere dhe misionin e BE-së për Sundimin e Ligjit. (EULEX). Këto masa janë marrë për t’i mundësuar KFOR-it të reagojë me shpejtësi ndaj çdo sfide të sigurisë, në përputhje me mandatin e tij të OKB-së”, thuhet në përgjigjen e tyre për RTV Dukagjini. (shih këtu)
Analiza:
Portali i dyshimtë “on27.net” ka publikuar një njoftim të KFOR-it, të cilëve u është bashkuar edhe EULEX-i në veri të Kosovës, për të mundësuar reagimin e shpejtë në rast të ndonjë eskalimi të mundshëm të situatës. Mirëpo, këtij artikulli i është vënë titull tendencioz me pretendimin se në veri është duke ndodhur diçka, si dhe EULEX-i niset urgjentisht për atje. Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi: Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
