Portali “Demokracia.com” ka publikuar një artikull me titull “Paralajmërohet: Kthehen masat antiCOVID”.
Pas verifikimit të fakteve nga hibrid.info, është vërtetuar se titulli është përgjithësues që nuk tregon se cili shtet ka paralajmëruar kthim të masave anti-Covid.
Detajet e lajmit qartësohen vetëm në përmbajtje, ku paraqitet deklarata e ministrit austriak të Shëndetësisë, Johannes Rauch rreth rikthimit të detyrimit për vendosjen maskës në këtë vend.
Duke ditur se ky portal publikon përmbajtje në gjuhën shqipe dhe se shumicën dërmuese të lexuesve i ka nga Kosova, artikulli me titull përgjithësues e jo sqarues, mund t’i dezinformojë lexuesit, duke lënë të kuptohet se paralajmërimi për rikthim të masave anti-Covid ka të bëjë me shtetin kosovarë.
Pjesë nga artikulli i publikuar në “Demokracia.com”:
Ministri austriak i Shëndetësisë, Johannes Rauch njoftoi në një konferencë për shtyp se detyrimi për të mbajtur maska në të gjithë vendin do të rifutet si masë, transmeton Demokracia.com.
Për momentin, kjo do të zbatohet për hapësirat e mbyllura si supermarketet, transport publik, farmacitë dhe bankat.
Qyteti i Vjenës ka akses më të rreptë dhe maskat janë të detyrueshme në të gjitha hapësirat e mbyllura, përfshirë shitjet me pakicë dhe koncerte.
“Ne do të rifusim kërkesën për mbajtjen e maskës në ambiente të brendshme,” tha Rauch.
Vegëza e artikullit të publikuar në “Demokracia.com”:
Analiza:
Portali “Demokracia.com” ka publikuar një artikull që ka të bëjë me paralajmërimin për rikthim të masave anti-Covid në Austri, më saktësisht mbajtjen e maskave në ambiente të brendshme, por në titull nuk sqaron se për cilin shtet bëhet fjalë.
Kjo lë të kuptohet se lajmi ka të bëjë me Kosovën, duke e ditur se ky medium është i regjistruar në vendin tonë dhe shumica e audiencës janë shqipfolës nga Kosova.
Pas kontrollit të fakteve bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
