Mediumet serbe në bazë të zhvillimeve të ndryshme që ndodhin në Kosovë, e sidomos në veri, e ri-sjellin në qarkullim narrativin e tyre “sulm ndaj serbëve”. Zhvillimet e fundit në veriun e Kosovës për zbatimin e masave të reciprocitetit për dokumentacion, si pasojë e dezinformatave, situata pati tendenca për tensionim. Këtu luajtën rol të madh keqinformimet nga mediumet, kryesisht me përmbajtje në gjuhën serbe, nga të cilat pati përpjekje që të dezinformohet për raste sulmesh ndaj serbëve nga pjesëtarë të Policisë së Kosovës. Ky narrativ i disa mediave serbe vazhdon dita-ditës, ku paralajmërohet për zbatim të dhunshëm të reciprocitetit dhe sulm ndaj serbëve në veri.
Narrativi dezinformues “po përgatitet sulm ndaj serbëve” u krijua bazuar në tri zhvillime të caktuara, nëpërmjet të cilave, disa mediume serbe e ri-sjellën kohë-pas-kohe.
Momenti i parë ishte, periudha para ngjarjeve të 31-korrikut, afatit të fundit të caktuar nga Qeveria e Kosovës për të zbatuar masën e reciprocitetit. Në kë date, një ditë para 1 gushtit, datës së planifikuar për të jetësuar këtë masë, u shpërndan shumë dezinformata në lidhje me zhvillimet që ndodhën në veri të Kosovës, të përcjella me barrikadimin e rrugëve që qonin në pikë-kalimet kufitare të Jarinës e Bërnjakut.
Me 5 korrik, shefi i zyrës për Kosovën në Qeverinë e Serbisë, Petar Petkoviq, në konferencën për media tha se Prishtina dëshiron t’i shtyjë serbët në luftë dhe shtoi se po rrëshqasim drejt një krize serioze “sepse në fund të shtatorit, në fillim të tetorit, Kurti po paralajmëron një sulm të madh ndaj serbëve”. “Srbijiadanas.rs”, përmes një artikulli të publikuar më 14 korrik, pretendon pa fakte se Kurti po planifikon një sulm ndaj serbëve për të arsyetuar shpenzimet, konkretisht të pushimeve në Greqi.
Paralajmërimin e parë për shpërndarjen e dezinformatave e bëri zëvendëskryeministri i Kosovës, Besnik Bislimi, duke shpërndarë në llogarinë e tij Twitter (30 Korrik) një lajm të përgatitur nga mediumi serb “b92.net” bazuar në deklaratat e Ministrit të Jashtëm i Serbisë, Nikolla Selakoviq, me titull “Shqiptarët po përgatisin ferrin për Kosovën dhe Metohinë”. Por, këtë paralajmërim, Selakoviq nuk e bazon në asnjë të dhënë apo fakt dhe nuk sqaron se çfarë nënkupton me cilësimin “ferr”. Rrjedhimit, i gjithë ky aludim i tij, nuk ndërlidhet me asnjë ngjarje, ndonëse ai lë të kuptohet se po e bazon në vendimin e Qeverisë së Kosovës, të 29 qershorit, për masën reciproke me Serbinë në aspektin e targave të automjeteve dhe letërnjoftimet. (shih këtu kontrollin e fakteve nga hibrid.info)
Megjithatë, vendimi i Qeverisë së Kosovës për të shtyrë zbatimin e vendimit për reciprocitet, në bashkëpunim me faktorin ndërkombëtar, bëri që shtendoset situata.
Por, përdorimi i narratives “përgatitje e sulmit të serbëve nga shqiptarët”, u përdor edhe pas ngjarjeve të 31-korrikut.
Pas zhvillimeve të fundit në veri kryeministri i Kosovës, Albin Kurti, u intervistua nga mediumet e huaja si: La Republicca, Radio Evropa e Lirë (REL) dhe Reuters.
Kurti në intervistën e dhënë për gazetën “La Republicca” vlerësoi se ekziston një rrezik i lartë për një konflikt të ri mes Kosovës dhe Serbisë. Ndërsa në intervistën për “Reuters”, ai ka folur për ndonjë sulm të mundshëm nga Serbia pasi, sipas tij, trazirat me pakicën serbe mund të rezultojnë në konflikt të armatosur. Kryeministri Kurti, në intervistën e dhënë për Radio Evropa e Lirë (REL) deklarojë se Situata në veri mund të përshkallëzohej në konflikt të armatosur “për shkak të frikës së injektuar nga Beogradi dhe për shkak të planeve të bëra në Rashkë dhe në Beograd”.
Reagimi i parë për deklaratat e bëra të Kurtit, u bë nga shefi i Zyrës për Kosovën në Qeverinë e Serbisë, Petar Petkoviq, i cili nëpërmjet një komunikate të publikuar më 11 gusht në llogarinë e tij në Twitter, i interpretoi deklaratat kryeministrit të Kosovës, Albin Kurti, si parapërgatitje dhe thirrje për luftë, e cila u interpretua nga mediat serbe se “Kurti përgatit armët për luftë“.
Në të njëjtën vijë ishin edhe deklaratat e presidentit të Serbisë, Aleksandar Vuçiq, i cili i ndërlidhi pohimet e Kurtit në këto intervista të bëra së fundmi për mediat ndërkombëtare, me parapërgatitje për sulm dhe likuidimin e serbëve. Vuçiq pretendimet e tij i ndërton duke i ndërlidh me intervistat e Albin Kurtit dhënë mediumeve ndërkombëtare (La Republicca, Radio Evropa e Lirë dhe Reuters), dhe duke i interpretuar ato si fushatë kundër Serbisë, dhe se jo Serbia por Kosova është duke planifikuar një sulm për likuidimin e serbëve. (shih këtu kontrollin e fakteve nga hibrid.info)
Narrativi dezinformues se po “përgatitet një sulm ndaj serbëve” në Kosovë nga mediumet serbe ndërlidhet edhe me deklaratat e ministrit të Mbrojtjes, Armend Mehaj, ministrit të Brendshëm, Xhelal Sveçla dhe zhvillimeve brenda Policisë së Kosovës.
Portali informativ në gjuhë serbe “Srbijadanas.com” më 10 gusht, në një artikull, hedh pretendimin se shqiptarët po përgatiten për sulm, duke interpretuar një deklaratë të ministrit të Mbrojtjes, Armend Mehaj, por pa paraqitur detaje e fakte mbështetëse. Ministri Mehaj në postimin e tij në Facebook deklaron se: “Ushtrinë e Republikës së Kosovës, do ta përgatisim dhe forcojmë çdo ditë, ajo është e gatshme ta mbroj çdo cep të territorit të Republikës” (shih këtu kontrollin e fakteve nga hibrid.info)
Pretendimi se Policia e Kosovës po armatoset për sulm ndaj serbëve ngritët në një artikull të publikuar më 15 gusht në mediumin serb “Alo.rs” ku bëhet interpretimin e raportit të thesarit të shtetit të Kosovës për rritjen e shpenzimeve për blerje të armatimit e pajisjeve tjera nga Ministria e Brendshme e Kosovës. Mediumi serb pretendon se janë blerë edhe bomba trullosëse, bomba me gaz lotsjellës me efekt të zgjatur, si dhe lloje të tjera të armëve të përdorura për të shpërndarë turmën e grumbulluar si dhe mikro-kamera për të vëzhguar veriun e të cilat nuk theksohen në raportin e thesarit të shtetit. Po ashtu, brenda artikullit pretendohet se ministri Sveçla ka urdhëruar komandantët e njësive në veri që të patrullojnë dhe t’i reklamojnë armët e reja, një pretendim i pabazë, kur kihen parasysh deklaratat e tij të postuara nga Sveçla në llogarinë e tij në Facebook. (shih këtu kontrollin e fakteve nga hibrid.info)
Pretendimin se Policia e Kosovës po përgatitet për t’i goditur serbët zë vend në përmbajtjen e artikullit të mediumit “Srbijadanas.com” të publikuar më 15 gusht, ku thuhet se Policia e Kosovës ka ngritur poste vrojtuese dhe se do të instalojnë pika snajperistësh për t’i sulmuar serbët dhe ngre shqetësimin e pabazuar se me 1 shtator shqiptarët po përgatisin çdo ditë terrenin për zbatimin e dhunshëm të kësaj mase. Pretendimet e mediumit serb që Policia e Kosovës ka ngritur poste vrojtuese dhe se do të instalojnë pika snajperistësh për t’i sulmuar serbët është i pabazuar në fakte konkrete. Edhe pretendimi se me 1 shtator masa e reciprocitetit do të zbatohet dhunshëm dhe se kush nuk e pranon një gjë të tillë do të sulmohet nga Policia e Kosovës është tendencioz dhe i pabazë. (shih këtu kontrollin e fakteve nga hibrid.info)
Artikujt e publikuar më 16 gusht në mediumin serb “Novosti.rs” pretendojnë se po bëhet një përgatitje për një zbatim të dhunshëm të masave të reciprocitetit me 1 shator duke i interpretuar si një sulm të armatosur ndaj serbëve. Po ashtu, mediumi pretendon se Policia e Kosovës është duke zhvilluar ushtrime me armë të rënda në atë zonë, pretendime të pabazuara që klasifikohen si “teori konspirative”. (shih këtu kontrollin e fakteve nga hibrid.info)
Zhvillimet e para dhe pas 31 korrikut i paraprin ri-sjelljes së narrativit dezinformues të mediumeve serbe “sulm ndaj serbëve”. Deklaratat e Albin Kurtit dhënë për mediumet e huaja qenë një brumë i nevojshëm që narrativi dezinformues serb të ri-shtrohet në mediat serbe. Po ashtu lajmet e fundit për armatosje të Policisë së Kosovës ndikuan që në mediat serbe të interpretohet si një parapërgatitje konkrete për sulm të armatosur ndaj serbëve në veri.
(Analizë nga Festim Rizanaj)
