Shkroi: Etriti Rexhepi
Publikohet një përmbajtje që pretendon se publicisti Baton Haxhiu është shprehur se edhe pas fitores së Lëvizjes Vetëvendosje në zgjedhjet e parakohshme parlamentare të 28 dhjetorit, ky subjekt politik nuk do të arrijë të formojë qeverinë.
Artikulli është publikuar më 29 dhjetor, 2025 në domainin “topm1.net”.
E vërteta?
Hibrid.info nuk ka gjetur fakte nga burime të besueshme që do të konfirmonin deklaratën e pretenduar të Haxhiut.
Hibrid.info hulumtoi me anë të makinës së kërkimit “Google”, më fjalët e titullit të këtij artikulli (shih këtu).
Në rezultatet nga kërkimi nuk u gjet asnjë përmbajtje që do të vërtetonte se Haxhiu ka deklaruar diçka të tillë.
Hibrid.info kontrolloi edhe në platformën për shpërndarjen e video-materialeve, “Youtube”, për të gjetur deklaratat publike të Haxhiut pas zgjedhjeve të 28 dhjetorit.
Rezultatet e kërkimit kanë gjetur se Haxhiu ka pasur një paraqitje publike në emisionin “Të paekspozuarit” në MCN TV (televizion në Shqipëri), i publikuar në Youtube më 30 dhjetor (shih këtu).
Haxhiu si i ftuar, në mesin e panelistëve tjerë, ka komentuar rezultatet e zgjedhjeve në Kosovë, por nuk ka deklaruar se subjekti fitues i zgjedhjeve nuk mund ta bëjë qeverinë.
Publicisti Haxhiu një deklaratë të tillë nuk e ka bërë as në shkrimet e tij autoriale (shih këtu) pas zgjedhjeve të 28 dhjetorit, të publikuara në “albanianpost.com” (shih këtu dhe këtu).
Analiza:
Baton Haxhiu nuk ka deklaruar se LVV nuk do të mund ta bëjë qeverinë edhe pas fitores në zgjedhje.
Nga kërkimet në artikujt e mediave kredile, paraqitjeve publike dhe shkrimeve autoriale të Haxhiut, pas zgjedhjeve të 28 dhjetorit, nuk konfirmohet se ai ka deklaruar ashtu siç pretendohet.
Andaj, bazuar në metodologjinë e punës, hibrid.info e vlerëson përmbajtjen si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.