Shkroi: Etrit Rexhepi
Është publikuar një imazh me portretet e këngëtarëve Goran Bregoviq dhe Shemsi Krasniqi – Shemi, me mbishkrimin që pretendon se Shemi është shprehur “Goran Bregoviç ka respekt për kombin shqiptar, ai duhet të thirret nga Kosova dhe të këndojë në qendër të Prishtinës”.
Imazhi është publikuar dje (18 qershor) nga faqja e mediumit “kosova-sot.info” në Facebook dhe i është bashkangjitur edhe vegëza e artikullit të publikuar në ueb-faqe (shih këtu).
Por cila është e vërteta?
Deklarata e solistit të grupit “Ilirët” është e vërtetë, por që e njëjta ishte bërë publike në vitin 2021, gjë e cila nuk bëhet e ditur në postimin e “kosova-sot.info”.
Vegëza e imazhit të publikuar nga faqja “Kosova Sot” në Facebook:
Ky publikim deri në momentin e trajtimit ka marrë 62 komente.
Hibrid.info ka konfirmuar në bazë të disa video-materialeve të shkëputur nga “Debat Plus” i “RTV Dukagjini”, se deklaratat e pretenduara janë të sakta (shih këtu dhe këtu).
Por, hibrid.info ka gjetur se këto deklarime publike të Shemit, datojnë nga gushti i viti 2021, kur ky i fundit ishte ftuar në këtë emision, për të diskutuar mbi këngëtarin nga Bosnja dhe Hercegovina, Goran Bregoviq, i cili në atë vit pritej të performonte në Korçë.
Fjalët e Shemit për Bregoviqin, janë konfirmuar edhe nga disa artikuj të publikuar në vitin 2021, nga disa media në gjuhën shqipe (shih këtu dhe këtu).
Analiza:
Deklarata e këngëtarit Shemsi Krasniqi – Shemi për këngëtarin nga Bosnja e Hercegovina, Goran Bregoviq është e vërtetë.
Por, në publikimin e këtij pretendimi nuk sqarohet se deklarata kishte ardhur në vitin 2021, që do të thotë se raportimi është bërë mbi një deklarim jo aktual.
Bazuar në metodologjinë e punës, hibrid.info e vlerëson këtë përmbajtje si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
