Shkroi: Etrit Rexhepi
Pretendohet për një mundësi pune me kohë të pjesshme nga 1-2 orë me pagë ditore prej 100 – 1000 euro, nga projekti Berkshire Hathaway XU Group.
Kjo është përmbajtja në gjuhën shqipe, që u është dërguar qytetarëve me anë të një mesazhi në aplikacionin “Whatsapp”.
Cila është e vërteta?
Gjetjet e hibrid.info tregojnë se mundësia e pretenduar nuk ekziston.
Mesazhi i dërguar nga numri me prefiksin + 95:
![](https://hibrid.info/wp-content/uploads/2024/07/sms-474x1024.jpg)
Çka gjeti hibrid.info?
Në një mesazh që e ka hasur hibrid.info, numri që ka dërguar këtë mesazh në telefon, ka prefiksin +95, që përdoret në shtetin e Mijanmarit (Birmanisë) (shih këtu). Ky numër ka përcjellur mesazhin e një numri tjetër, që ka prefiksin e SHBA-së (shih këtu). Në këto numra në “Whatsapp” mungojnë të dhënat e identitetit të personit apo institucionit që përdorin ato.
Mesazhi nuk e bën të qartë profesionin, që kërkohet për punësim. Hibrid.info ka hulumtuar me anë të makinave të kërkimit, për “Berkshire Hathaway XU Group”, emri i së cilës figuron në përmbajtjen e këtij mesazhi.
Në Google, tregohet për një kompani të sigurimeve, me emrin “Berkshire Hathaway”, të cilës në referimet zyrtare, i mungon togfjalëshi “XU Group” (shih këtu).
Kompania në fjalë në vitin 2022, kishte reaguar ndaj mashtrimeve në emër të saj, të realizuara në forma të ngjashme, ku emri i kësaj kompanie ishte paraqitur gabimisht (shih këtu). Kjo e bën edhe më të dyshimtë përmbajtjen në fjalë.
Analiza:
Pretendimi me anë të një mesazhi, për një mundësi pune me kohë të pjesshme, është mashtrim.
Mesazhi në gjuhën shqipe është dërguar nga prefiksi i shtetit të Mijanmarit, nuk e bën të qartë profesionin e kërkuar dhe ka manipuluar me emrin zyrtar të kompanisë që pretendon se ofron këtë mundësi.
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.