Shkroi: Fatbardh Dema
Publikohet një përmbajtje që pretendon se nga data 1 korrik 2024, Qeveria do të rrisë pensionet.
Ky pretendim përmes një mbishkrimi me anë të një vegëze në formë imazhi, që mban emblemën e Qeverisë së Kosovës, u publikua dje (10 korrik) në Facebook nga faqja që mban emrin “Blue sky”.
E vërteta?
Pas hulumtimit të kryer, hibrid.info nuk ka gjetur asnjë informacion të publikuar, që do ta mbështeste pretendimin e bërë nga faqja e lartcekur.
Duke u bazuar në kërkimin e bërë përmes Google, ditët e fundit ishin publikuar artikuj në lidhje me rritjen e pensioneve në Shqipëri nga muaji tetor. (këtu)
Vegëza e postimit të publikuar në Facebook nga faqja “Blue sky”:
Mbishkrimi i publikuar në formë imazhi:
Qeveria do të rrisë pensionet për të moshuarit
Pensionet do të rriten duke filluar nga 1 korriku 2024! Thjesht klikoni në datën tuaj të lindjes për të parë pensionin tuaj.
Hibrid.info ka gjetur se pas klikimit të vegëzës se lartcekur, ueb-faqja “retirementsavings31.online” e shfaqur nuk jep asnjë mundësi aplikimi për atë që pretendohet në njoftim. Nga informatatat e paraqitura, mungon emrin i institucionit, organizatës apo biznesit që përfaqëson ueb-faqja si dhe nuk dëshmohet asnjë lidhje e saj me institucionet e Kosovës. (shih këtu)
Hibrid.info ka kontrolluar edhe kredibilitetin e ueb-faqes së lartcekur, me anë të platformës që vlerëson besueshmërinë e faqeve, “ScamAdviser.com”, ku sipas të dhënave tregohet se kjo ueb-faqe është e dyshimtë. (shih këtu)
As në ueb-faqen zyrtare të Qeverisë së Kosovës, nuk ka asnjë informatë në lidhje me rritjen e pensioneve nga muaji korrik. (këtu)
Analiza:
Pretendimi se nga muaji korrik Qeveria e Kosovës ka marrë vendim për rritjen e pensioneve, është i pa vërtetë.
Publikuesi i njoftimit është i dyshimtë, ndërsa nuk është gjetur asnjë informacion i publikuar nga burime kredibile në lidhje me rritjen e pensioneve.
Bazuar në metodologjinë e punës, hybrid.info e vlerëson përmbajtjen si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
