Mediumi online në gjuhën shqipe “gazeta-shqip.com” ka publikuar dje (5 tetor) një artikull me titull, “TRONDITËSE/ Babai tenton të përdhunojë të birin 9-vjeçar, si e zbuloi nëna ngjarjen”.
Hibrid.info ka verifikuar dhe ka gjetur se titulli i këtij artikulli nuk sqaron shtetin se ku ka ndodhur ngjarja, andaj edhe titulli si i tillë konsiderohet përgjithësues.
Lajmi qartësohet në përmbajtje, më saktësisht në kreun e lajmit, kur thuhet se, “Një ngjarje e rëndë ka ndodhur në Greqi, ku një burrë ka tentuar të përdhunojë djalit e tij vetëm 9 vjeç”.
Portali informativ “Gazeta Shqip” është i regjistruar në Shqipëri (shih këtu) dhe përmbajtja e ofruar nga ky portal është në gjuhën shqipe, prandaj edhe titulli i lartcekur lë hapësirë për interpretim se ngjarja ka ndodhur në hapësirat shqip-folëse.
Vegëza e artikullit të publikuar në portalin “gazeta-shqip.com”:
Hibrid.info ka gjetur artikullin e publikuar edhe në media të huaja, të cilat kanë njoftuar për ngjarjen e ndodhur në Greqi. (shih këtu dhe këtu)
Analiza:
Portali informativ “gazeta-shqip” ka publikuar një artikull në lidhje me një tentim dhunimi në Greqi, në titullin e të cilës nuk është sqaruar vendndodhja e ngjarjes.
Andaj edhe bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
