Shkroi: Fatbardh Dema
Në median sociale Facebook po shpërndahen përmbajtje në gjuhën shqipe që pretendojnë për rritje e shtesa të pensioneve.
Këto përmbajtje janë gjetur të publikuara më 4 dhe 11 shtator nga faqet në Facebook “Worry-free life” dhe “Fund Services”.
E vërteta?
Pas hulumtimit të kryer nga hibrid.info, është vërtetuar se nuk është paraparë të ketë rritje të pensioneve për këtë vit.
Vegëza e postimit të publikuar në Facebook nga faqet “Worry-free life” dhe “Fund Services”.
Pas klikimit në vegëzat e ofruara në këto postime, hapet ueb-faqe, të cilave u mungon emri i institucionit, organizatës apo biznesit që përfaqëson.
Në këto ueb-faqe shfaqen disa seksione, të cilat në shumicën e rasteve, pas klikimit, dërgojnë në ueb-faqe të jashtme, por që nuk kanë të bëjnë asgjë me Qeverinë e Kosovës apo me ndonjë vendim të saj (shih këtu dhe këtu).
Hibrid.info ka kontrolluar këto ueb-faqe me anë të platformës për kredibilitetin e ueb-faqeve, “ScamDoc.com“. Sipas të dhënave të kësaj platforme, besueshmëria për këto ueb-faqe vlerësohet të jetë shumë e ulët dhe se nuk dihet se kush qëndron prapa tyre. (shih këtu dhe këtu)
Në seksionin “About” të faqes Worry-free life, nuk ka asnjë të dhënë rreth veprimtarisë së saj (shih këtu). Ndërsa në faqen tjetër Fund Services, shfaqet një adresë në shtetin e Kinës (shih këtu)
As në ueb-faqen zyrtare të Qeverisë së Kosovës, nuk ka asnjë informatë në lidhje me rritjen e pensioneve. (shih këtu)
Analiza:
Pretendimet se janë rritur pensionet, janë të rreme.
Publikuesit e njoftimeve në Facebook janë të dyshimtë, ndërsa nuk është gjetur asnjë informacion i publikuar në burime kredibile në lidhje me rritjen e pensioneve.
Bazuar në metodologjinë e punës, hibrid.info e vlerëson përmbajtjen si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
