Shkroi: Sefer Zogaj
Faqja në median sociale TikTok, “faktehistorikeShqip”, më 11 gusht, ka publikuar një fotografi të gazetarit Halil Matoshi, dhe në mbishkrim të imazhit thuhet “Halil Matoshi: Albin Kurti është njeri i UDB-së”.
Më pas kjo faqe pyet ndjekësit se çfarë mendojnë për këtë “deklaratë” të Matoshit.
Deri në shkrimin e këtij artikulli, postimi ka marrë 111 pëlqime, 407 komente dhe është shikuar mbi 18 mijë herë.
E vërteta?
Pas hulumtimit të kryer nga hibrid.info, u vërtetua se Matoshi asnjëherë nuk ka pretenduar qoftë në paraqitjet televizive, artikujt në media apo postimet në Facebook se Kurti është agjent i Shërbimit të Sigurimit Shtetëror jugosllav (UDBA).
Pas kërkimit përmes Google me fjalët kyçe “Halil Matoshi: Albin Kurti është njeri i UDB-së”, nuk është gjetur një përmbajtje e tillë e publikuar nga burime kredibile. (shih këtu)
Gjatë kërkimit online, hibrid.info ka gjetur se Matoshi ndër vite ka deklaruar se Kurti në burgun e Pozharevcit ka mbrojtur Kosovën. (shih këtu dhe këtu)
Analiza:
Faqja “faktehistorikeShqip” nuk iu ka referuar asnjë burimi për pretendimin se Matoshi ka deklaruar për Kurtin se është agjent i UDB-së.
Nga kërkimet e Hibrid.info, një deklaratë e tillë nuk është gjetur e publikuar në asnjë burim kredibil.
Bazuar në metodologjinë e punës, hibrid.info e vlerëson këtë artikull si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Ky artikull është përgatitur si pjesë e projektit ‘Kundër Dezinformimit përmes Inovacionit dhe Mësimit Eksperimental’, i mbështetur nga Ambasada e Shteteve të Bashkuara të Amerikës në Prishtinë. Artikulli është verifikuar nga ekipi i Hibrid.info dhe ekspertët e angazhuar për të siguruar përputhjen me metodologjinë tonë për verifikimin e fakteve. Ky artikull përmban verifikime të mirëfillta, por nuk pasqyron domosdoshmërisht pikëpamjet e Hibrid.info apo të Ambasadës së SHBA-së.
