Shkroi: Fatbardh Dema
Një medium në gjuhën serbe po pretendon pa asnjë fakt se kryeministri Albin Kurti po organizon protestë kundër presidentit të Serbisë, Alleksandar Vuçiq, në Cyrih.
Sipas këtij pretendimi, protesta do të zhvillohet para një restoranti në këtë qytet, të mërkurën, ku pritet të qëndrojë presidenti serb për një darkë.
Përmbajtja në fjalë është publikuar sot (3 dhjetor) nga media në gjuhën serbe “Informer”, dhe e cila është transmetuar si e tillë edhe në së paku dy media tjera në gjuhën serbe (këtu dhe këtu)
Çka nuk shkon me këtë artikull?
Media serbe “Informer” ka publikuar një pretendim se të mërkurën, para restorantit “Kronenhalle” në Cyrih, do të organizohet një protestë nga shqiptarët kundër presidentit serb Vuçiq, i cili thuhet se do të qëndrojë në restorantin në fjalë për një darkë.
Sipas artikullit, kjo protestë është organizuar nën dirigjimin e kryeministrit Kurti.
“Siç mëson Informer, nesër në Cyrih, para restorantit ‘Kronenhalle’, ku është planifikuar që presidenti serb Alleksandar Vuçiq të ketë një darkë, do të mbahet një protestë e shqiptarëve nën shkopin dirigjues të Albin Kurtit, dhe krejt kjo sipas metodës së protestave opozitare në Serbi”.
“Gjegjësisht, shqiptarët po organizojnë protesta kundër presidentit serb të mërkurën, pasdite në qendër të Cyrihut”, u tha në pretendimin e pabazuar të Informer.
Hibrid.info nuk ka gjetur asnjë fakt se një protestë e tillë do të organizohet nesër nga shqiptarët në Cyrih, e aq më pak pranë restorantit “Kronenhalle”. (shih këtu)
Edhe në një grup aktiv dhe publik në Facebook i quajtur “Shqiptarët/et ne Zürich” që numëron mbi 9 mijë anëtarë, në seksionin “Events” (Ngjarjet), nuk figuron asnjë ngjarje e paralajmëruar në këtë qytet. (këtu)
Po ashtu, hibrid.info ka gjetur edhe një grup tjetër në Facebook me emrin “Shqiptaret Ne Zvicer” me mbi 32 mijë anëtarë. As në këtë grup nuk ka ndonjë njoftim për ngjarje të paralajmëruar në lidhje me ndonjë protestë apo tubim. (këtu)
Analiza:
Mediumi në gjuhën serbe “Informer” ka pretenduar se Kurti, të mërkurën (3 dhjetor) po organizon protestë në Cyrih kundër presidentit serb Vuçiq, pasi ky i fundit pritet që nesër të qëndrojë për një darkë në këtë qytet.
Pas verifikimit të fakteve të kryer nga hibrid.info, u vërtetua se ky pretendim i bërë nga mediumi i lartcekur nuk ofron asnjë fakt që do ta mbështeste atë.
Po ashtu, nga hulumtimit i kryer online, nuk është gjetur asnjë njoftim për ngjarje të paralajmëruar në lidhje me ndonjë protestë apo tubim të shqiptarëve në Cyrih.
Bazuar në metodologjinë e punës, hibrid.info e vlerëson artikullin e publikuar nga “Informer.rs”, si “ Teori Konspirative”.
Arsyetimi:
Vlerësim si “Teori konspirative” marrin ato përmbajtje informative të cilat në vete përmbajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre përmbajtje është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
