Disa portale informative kanë publikuar dje (5 shtator) artikullin me titull ““Misioni u përmbush me sukses”- Ushtarët turq të KFOR-it nesër largohen nga Kosova”.
Pas verifikimit të fakteve të kryer nga hibrid.info, është vërtetuar se titulli nuk korrespondon me përmbajtjen.
Titulli i këtij artikulli bën të kuptohet se bëhet fjalë për të gjithë ushtarët turq të KFOR-it, ndërsa në përmbajtje qartësohet se Turqia tërheqë nga Kosova ushtarët rezervë, të cilët erdhën në qershor të këtij viti në përgjigje të kërkesës së NATO-s pas tensioneve të fundit në veri.
Vegëza e artikullit të publikuar në portalet “Veriu.info” dhe “GazetaBlic.com”:
Ky artikull i publikuar nga portalet e lartcekura është marr nga Agjencia e lajmeve “Anadolu Agency” në seksionin në gjuhën shqipe.
Hibrid.info ka gjetur artikullin e publikuar nga “Anadolu Agency”, dhe ka vërtetuar se në titullin specifikohet se bëhet fjalë për tërheqjen e trupave rezervë të ushtarëve turq të KFOR-it. (shih këtu)

Screenshot i artikullit të publikuar nga Anadolu Agency, i përkthyer në shqip
Pra, portalet informative në gjuhën shqipe kanë publikuar artikullin e marr nga Anadolu Agency, të cilës i kanë vënë titull jo adekuat.
Duke i vënë në titull fjalën “ushtarët” në shumës, lë të nënkuptohet se bëhet fjalë për largimin e të gjithë ushtarëve turq.
Përveç, në Anadolu Agency, njoftimi për tërheqjen e trupave rezervë të ushtarëve turq të KFOR-it nga Kosova, është gjetur edhe në faqen zyrtare në Facebook të Ministrisë së Mbrojtjes së Republikës së Turqisë. (shih këtu)
Analiza:
Disa portale informative në Kosovë kanë publikuar njoftimin për tërheqjen e trupave rezervë të ushtarëve turq të KFOR-it nga Kosova.
Por në titull kanë lënë të kuptohet se bëhet fjalë për të gjithë ushtarët turq në Kosovë.
Bazuar në metodologjinë e punës, hibrid.info e vlerëson këtë artikull si “Manipulim i fakteve”.
Arsyetimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.