U publikua një artikull me titull “Ngjarje tronditëse/ Nusja vret me thikë burrin dhe vjehrrin”.
Ky artikull u publikua nga portali “ntv.al” si dhe në faqen zyrtare NTV Televizion në Facebook.
Çka nuk shkon me këtë përmbajtje?
Pas kontrollit të fakteve të kryer nga hibrid.info, u vërtetua se titulli i këtij artikulli është përgjithësues që nuk sqaron se ku ka ndodhur ngjarja, e që vetëm në përmbajtje sqarohet se bëhet fjalë për ngjarje të ndodhur në Maqedoninë e Veriut. Ndërsa fotografia e përdorur në këtë artikull është e një ngjarjeje nga viti 2016 në Prishtinë.
Vegëza e artikullit të publikuar në portalin “ntv.al”:
Pjesë nga artikulli i publikuar në portali “ntv.al”:
Ngjarje tronditëse/ Nusja vret me thikë burrin dhe vjehrrin
Një ngjarje e rëndë ka tronditur mbrëmjen e djeshme qytetin e Kratovës, ku një 63-vjeçar dhe djali i tij janë vrarë me thikë nga nusja e këtij të fundit.
Nusja 36-vjeçare, e identifikuar me inicialet V.I. është arrestuar, ndërsa trupave të dy viktimave po u bëhet autopsia.
“Më datë 13.06.2024, në ora 22:08, nga ana e punonjësve policorë të Kratovës, u privua nga liria 36 vjeçarja V.I e cila dyshohet se në shtëpinë familjare në Kratovë ka sulmuar me mjet të mprehtë bashkëshortin e saj J.I (38) dhe babanë e tij S.I.(63), të cilët kanë ndërruar jetë. Sipas udhëzimeve të prokurorit publik, trupat e viktimave janë dorëzuar për obduksion derisa 36 vjeçarja V.I. është arrestuar dhe ndaluar në stacionin policor”, njoftojnë nga ministria e Brendshme maqedonase.
Pas hulumtimit përmes programit të automatizuar “InVID”, hibrid.info ka arritur të gjejë se imazhi është realizuar në vitin 2016 nga një ngjarje e ndodhur në Prishtinë. (shih këtu pamjen nga sekonda e 30-të)
Screenshot nga video-materiali i publikuar në Youtube nga kanali “KlanKosova”
Analiza:
Me një fotografi të vitit 2016 të realizuar në Prishtinë, u publikua një artikull rreth një ngjarjeje në Maqedoni të Veriut, pa e sqaruar në titull vendndodhjen.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
