Shkroi: Etrit Rexhepi
Publikohet një imazh me mbishkrimin që pretendon se Lidhja Demokratike e Kosovës (LDK) e ka dërguar në Gjykatën Kushtetuese vendimin e fundit të Qeverisë së Kosovës për ndarjen nga 100 euro për fëmijët dhe pensionistët në Kosovë.
Përmbajtja është publikuar dje (22 dhjetor) në TikTok nga një llogari me emrin “toke.ilirodardane”.
A qëndron ky pretendim?
Hibrid.info ka gjetur se deri më tani LDK nuk e ka dërguar për shqyrtim vendimin në fjalë në institucionin përkatës.
Imazhi i paraqitur shfaq titullin e një artikulli të publikuar në mediumin online “telegrafi.com”. Hibrid.info ka kontrolluar në faqen e këtij portali, por nuk ka gjetur artikullin në fjalë.
Hibrid.info ka gjetur një artikull në faqen e këtij mediumi, titulli i të cilit nis me fjalinë “Edhe LDK e dërgon në Gjykatën Kushtetuse”, por teksti në fjalë jep lajmin për Ligjin për Këshillin e Pavarur Mbikëqyrës për Shërbimin Civil të Kosovës, ligj i cili ishte ankimuar nga ky subjekti i dytë opozitar.
Çka do të thotë se ky imazh mund të jetë manipuluar, në mënyrë që të shfaqet në formën siç është paraqitur në përmbajtjen e trajtuar.
Hibrid.info po ashtu ka hulumtuar përmes makinës së kërkimit, “Google”, për të njëjtin pretendim, por rezultatet nuk kanë shfaqur asnjë artikull ku konfirmohet pretendimi i trajtuar.
Analiza:
Pretendimi se LDK e ka dërguar në Gjykatën Kushtetuese vendimin e fundit të Qeverisë së Kosovës për ndarjen prej 100 eurove për fëmijët dhe pensionistët në Kosovë, është i pasaktë.
Ky pretendim është shfaqur përmes një imazhi të manipuluar, që paraqitet si artikull i publikuar nga “telegrafi.com”.
Po ashtu, nuk ka burim kredibil që e konfirmon pretendimin.
Andaj, bazuar në metodologjinë e punës, hibrid.info e vlerëson pretendimin si “Mashtrim” dhe “Lajm i rremë”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
