Shkroi: Etrit Rexhepi
Publikohen artikuj në gjuhën shqipe që pretendojnë se një numër i madh i arinjve kanë bllokuar rrugën para hyrjes së Parkut Kombëtar të Yellowstone në Shtetet e Bashkuara të Amerikës (ShBA).
Artikujt janë publikuar nga dy mediume me emrat “PressOnline.info” (26 mars) dhe “Koha.mk” (29 mars).
Por, cila është e vërteta?
Hibrid.info ka gjetur se fotografia me anë të cilit është paraqitur pretendimi, është gjeneruar nga Inteligjenca Artificiale (IA).
Ky artikull i postuar edhe në faqen në Facebook të “PressOnline.info” deri në momentin e trajtimit ka marrë mbi 3 mijë e 300 pëlqime dhe ka mbi 470 komente, në bazë të së cilave mund të vlerësohet se audienca mund ta lexojë si të mirëqenë pretendimin (shih këtu).
Hibrid.info ka përdorur platformën “HiveModeration.com” për të vlerësuar nëse kjo fotografi është reale.
Rezultatet nga vlerësimi i kësaj platforme kanë treguar se kjo fotografi ka mundësi të ketë përmbajtje të gjeneruar nga IA apo deepfake.
Hibrid.info po ashtu ka gjetur se i njëjti pretendim është kontrolluar dhe vlerësuar si i rremë nga “Snopes.com”, kontrolluesi i fakteve në gjuhën angleze (shih këtu).
Analiza:
Pretendimi se një numër i madh i arinjve kanë bllokuar rrugën para hyrjes së Parkut Kombëtar të Yellowstone në ShBA nuk qëndron.
Fotografia me anë të së cilës është dhënë ky pretendim, është gjeneruar nga IA.
Bazuar në metodologjinë e punës, hibrid.info e vlerëson përmbajtjen si “të paverifikuar”.
Arsyetimi
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.
