Shkroi: Etrit Rexhepi
Është publikuar një video-material në kopertinën e të cilit është vendosur mbishkrimi “KOSOVA HYN NË KIE”.
Videoja me pretendimin se Kosova është anëtarësuar në Këshillin e Evropës (KiE), është publikuar sot (22 tetor) në kanalin zyrtar të mediumit në gjuhën shqipe “NTV Televizion”, në Youtube.
A është anëtarësuar Kosova në KiE?
Kërkimet e hibrid.info nuk kanë gjetur fakte që konfirmojnë pretendimin.
Duke qenë se pretendimi është shkruar në kohën e tashme të mënyrës dëftore (shih këtu), hibrid.info vlerëson se informata është publikuar si fakt i vërtetë.
Pas verifikimit të përmbajtjes, është gjetur se video-materiali përmban disa kronika televizive me lajme dhe ngjarje që lidhen me Kosovën, por që në asnjërën prej tyre nuk paraqitet ndonjë njoftim që tregon se Kosova ka hyrë në KiE.
Gjetjet tregojnë se në mbledhjen e Këshillit të Ministrave të KiE, (17 maj 2024), u vendos që Kosova të lihej jashtë rendit të ditës, ku një pjesë e mirë e vendeve anëtare të KiE ripërsëritën qëndrimin se kusht për të ecur përpara është që Kosova të hedhë hapa drejt themelimit të Asociacionit të komunave me shumicë serbe (shih këtu).
Hibrid.info, gjithashtu ka hasur në artikuj të publikuar dje (21 tetor), ku është raportuar për një deklaratë të Ndihmës Sekretarit Amerikan të Shtetit për Evropën dhe Euroazinë, James O’Brien, ku ka folur për arsyet e mosanëtarësimit të Kosovës në këtë mekanizëm (shih këtu, këtu dhe këtu).
Deklaratat e O’Brien në fakt e dëshmojnë se ende nuk ka një vendim zyrtar që vërteton pretendimin e trajtuar në përmbajtjen e Televizionit NTV.
Analiza:
Pretendimi se Kosova ka hyrë në Këshillin e Evropës (KiE) është i pasaktë.
Pas një verifikimi të detajuar, është zbuluar se videoja përmban kronika televizive të ndryshme që lidhen me Kosovën, por që nuk paraqesin asnjë njoftim zyrtar për anëtarësimin e Kosovës në këtë mekanizëm.
Gjithashtu, edhe kërkimet manuale në internet tregojnë se Kosova ende nuk është bërë pjesë e KiE-së.
Prandaj, bazuar në metodologjinë e punës, hibrid.info e vlerëson këtë përmbajtje si “Dezinformatë” dhe “Clickbait”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
