Shkroi: Fatbardh Dema
Nëpërmjet një titulli është pretenduar se presidenti i Kenias, William Ruto, ka marrë para nga ish-ministri i Punëve të Jashtme të Kosovës, Behgjet Pacolli, që Kenia ta njohë Kosovën si shtet të pavarur.
Publikimi u bë nga mediumi në gjuhën serbe “pravda.rs”, me titull “Ruto mori para nga Pacolli për njohjen e të ashtuquajturës Kosovë”. Artikulli u publikua më 27 mars dhe në imazh kryesor përdoret një fotografi e ceremonisë së nënshkrimit të deklaratës njohëse.
Por çka nuk shkon me këtë pretendim?
Artikulli nuk shfaq as edhe një fakt se Ruto ka marrë para për njohjen e Kosovës.
Në fakt e gjithë përmbajtja bazohet në një deklaratë të ish-ambasadorit serb në Kenia, Dragan Zupanjevac për “Kosovo-online.com”.
–
Deklarata e Zupanjevacit për “kosovo-online.com” (27 mars):
“Kur Kenia ishte anëtare jo e përhershme e Këshillit të Sigurimit të Kombeve të Bashkuara më 2021 dhe 2022, ajo foli me parime në seancat për Kosovën. Tani ka një ndryshim, kur ish-ministri i të ashtuquajturës Kosovë, Pacolli, që de-facto është në raporte korruptive me presidentin, financoi një ndryshim qëndrimi, dhe kjo nuk është diçka e mirë për Serbinë”.
Përderisa “kosovo-online.com” tregoi në titull se ky pretendim është i Zupanjevacit, një gjë të tillë nuk e bëri “pravda.rs”.
Zupanjevac nuk ka paraqitur ndonjë fakt apo dokument që vërteton pretendimin e tij.
Në një deklaratë për versionin në serbisht të BBC-së, Pacolli ka folur për investimet e tij në Kenia.
“Grupi im i biznesit tashmë ka investime të mëdha në Kenia – në turizëm dhe në infrastrukturë. Gjithsesi, nuk e besoj se këto investime ishin faktor vendimtar në vendimin për njohje”, citohet të ketë thënë ai.
Në njoftimin e Departamentit të Shtetit të Kenias për Punë të Jashtme në X thuhet:
“Kenia e njeh Kosovën si shtet. Deklarata e Pavarësisë e 17 shkurtit 2008, ka marrë mbështetjen e Gjykatës Ndërkombëtare të Drejtësisë më 2010. Kenia e ka njohur Kosovën në interes të paqes dhe sigurisë ndërkombëtare, integritetit territorial dhe në avancimin e forcimit të raporteve me shtetet në Ballkan”.
Për njohjen e Kenias
Kenia e njohu Kosovën më 26 mars. Sipas listës së MPJ-së së Kosovës, shteti afrikan është i 118-i që e njeh Pavarësinë e shpallur më 2008. Njohja nga Kenia ishte e para në katër vjetët e fundit. (Shih këtu)
Njoftimin për njohje e bëri të ditur Pacolli që publikoi nga ajo që tha se ishte ceremonia e nënshkrimit të njohjes. Më pas presidentja Vjosa Osmani publikoi vendimin e Republikës së Kenias.
Pacolli në njoftim ka thënë se Ruto i kishte premtuar njohjen qysh më 2016.
Ruto ka pasur takime me presidenten Osmani tri herë gjatë 2024-s.
Pacolli ka mbajtur disa role të larta në Kosovë. Pos ministër i Punëve të Jashtme, ai ka qenë edhe president e zëvendëskryeministër. (Shih këtu)
Analiza:
Mediumi në gjuhën serbe “pravda.rs” ka pretenduar se presidenti i Kenias ka marrë para nga ish-ministri i Punëve të Jashtme të Kosovës, Behgjet Pacolli, për ta njohur Kosovën si shtet.
Artikulli nuk ofron asnjë fakt dhe bazohet tërësisht në një deklaratë të ish-ambasadorit të Serbisë në Kenia.
Bazuar në metodologjinë e punës, hibrid.info e vlerëson pretendimin si “Teori konspirative”.
Arsyetimi:
Vlerësim si “Teori konspirative” marrin ato përmbajtje informative të cilat në vete përmbajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre përmbajtje është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
