Llogaria në median sociale Tik Tok “fakte.konspirative” që krijon përmbajtje në gjuhën shqipe, ka dhënë disa pretendime sa i përket karaktereve të filmit të animuar “Minions”, duke shtuar se ata janë bazuar në “fëmijët hebrenjë të torturuar nga nazistët gjatë Holokaustit”.
Në këtë video-material, kjo llogari ka paraqitur edhe një imazh të disa personave të pajisur me një veshje/pajisje që ngjason me karakteret e “Minions”, për të cilët pretendon se janë fëmijë hebrenjë.
Mirëpo, pas hulumtimit përmes makinave online të kërkimit, hibrid.info ka arritur të vërtetojë se në këtë imazh paraqiten zhytës profesionalë dhe se ato rroba/pajisje janë përdorur rreth vitit 1909.
Vegëza e video-materialit të publikuar në Tik Tok nga llogaria “fakte.konspirative”:
Këtij video-materiali i është shtuar përmbajtja: “Minionët” bazohen në këta fëmijë hebrenj të torturuar nga nazistët gjatë Holokaustit, zërat e tyre të lartë në film kanë për qëllim të përfaqësojnë britmat e larta të fëmijëve gjatë eksperimenteve mizore.
Pas hulumtimit të kryer përmes programit të automatizuar online “InVID”, hibrid.info ka arritur të gjejë këtë fotografi të zhytësve profesionalë, në platformën online “DivingHeritage.com” (që merret me zhvillimin ndër vite të pajisjeve për zhytje profesionale). Në përshkrimin e kësaj fotografie thuhet se imazhi është shkrepur rreth vitit 1909. (shih këtu)
Fotografia e gjetur në këtë platformë online mban përshkrimin: “Ekuipazhi i trajnimit të HM Submarine C7 me aparatin e arratisjes Hall-Rees, rreth vitit 1909. Xhaketa e aparatit ishte e pajisur me një dhomë lëvizëse të brendshme në pjesën e përparme dhe tubin e fryrjes me gojë. Pasi të fryhet dritarja mund të hapet në sipërfaqe. Ilustrimi i vitit 1910 nga G.H. Davis gjatë vizitës së Mbretit përshkruan një situatë ideale brenda nëndetëses, e cila në realitetin e sotëm do të ishte shumë e ngushtë!
![](https://hibrid.info/wp-content/uploads/2023/02/02-1024x498.png)
Analiza:
Një llogari në “Tik Tok” ka publikuar një video-material me pretendim se karakteret e filmit të animuar “Minions” janë bazuar në një fotografi të “fëmijëve hebrenjë të torturuar nga nazistët gjatë Holokaustit”.
Pas verifikimit të fakteve, hibrid.info ka vërtetuar se imazhi i përdorur nga kjo llogari në “Tik Tok” nuk paraqet fëmijët hebrenjë, siç pretendohet, por zhytësit profesionalë me veshjet/pajisjet e zhytjes rreth vitit 1909.
Bazuar në metodologjinë e punës, hibrid.info e vlerëson përmbajtjen në këtë video-material si “Teori Konspirative”.
Arsyetimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.