Portali informativ “Paparaci.com”, ka publikuar sot (1 nëntor) një artikull me titull “Instagram dhe Facebook bëhen me pagesë”.
Hibrid.info ka verifikuar faktet dhe ka vërtetuar se titulli i këtij artikulli është përgjithësues sepse nuk sqaron se për çfarë llojë pagesash bëhet fjalë dhe se në cilat vende do të praktikohet ky vendim.
Lajmi në kreun e tij nuk sqaron menjëherë aspektin e pagesave por tregon se në cilat vende do të vihet në zbatim vendimi, ku thuhet “Kompania e rrjeteve sociale Meta ka vendosur të bëjë dy platformat më të ndjekura nga njerëzit Instagram dhe Facebook me pagesë në Bashkimin Europian dhe Zvicër, duke filluar nga ky muaj”.
Në vazhdim të përmbajtjes lajmi sqaron se bëhet fjalë për disa lloje të pagesave, ku thuhet “Risia e këtij fakti është se versionet me pagesë të Facebook dhe Instagram nuk do të kenë më reklama”.
Hibrid.info vlerëson se titulli si i tillë lë hapësirë për interpretim se ky vendim do të praktikohet edhe në vendin tonë, duke parë që ky portal informativ është i regjistruar në Kosovë (shih këtu)
Vegëza e artikullit të publikuar në portalin “Paparaci.com”:
Pjesë nga artikulli i publikuar në portalin “Paparaci.com”:
Kompania e rrjeteve sociale Meta ka vendosur të bëjë dy platformat më të ndjekura nga njerëzit Instagram dhe Facebook me pagesë në Bashkimin Europian dhe Zvicër, duke filluar nga ky muaj.
Risia e këtij fakti është se versionet me pagesë të Facebook dhe Instagram nuk do të kenë më reklama.
Analiza:
Portali informativ “Paparaci.com” ka publikuar një artikull në lidhje me një vendim të ri të kompanisë Meta në lidhje me pagesat në rrjetin social Instagram dhe Facebook, por që në titull nuk sqarohet për çfarë pagesa dhe për cilat shtete bëhet fjalë.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
