Shkroi: Etrit Rexhepi
Publikohet një përmbajtje që pretendon se Ahmed al-Sharaa, lideri i ri i Sirisë, ka deklaruar se gjyshi i tij është me prejardhje shqiptare dhe vjen nga Kosova.
Përmbajtja e pretenduar është publikuar me 19 dhjetor në TikTok nga llogaria me emrin “pograddeccii”.
Çka gjeti hibrid.info?
Hulumtimi i hibrid.info nuk e konfirmon pretendimin në fjalë.
Hibrid.info së pari ka hulumtuar në gjuhën shqipe përmes makinës së kërkimit, “Google”, për të gjetur në rast se deklarimi për prejardhjen shqiptare ka ardhur nga vet al-Sharaa, por rezultatet e kërkimit nuk vërtetojnë diçka të tillë.
Edhe kërkimi në gjuhën angleze, nuk e dëshmon pretendimin.
Hibrid.info ka hulumtuar për prejardhjen e udhëheqësit defakto të Sirisë, ku në bazë të asaj që është gjetur, deri te stërgjyshi i tij, nuk e vërteton origjinën shqiptare të familjes së liderit të ri sirian.
Analiza:
Pretendimi se Ahmed al-Sharaa, lideri i ri sirian, ka deklaruar se gjyshi i tij është me prejardhje shqiptare dhe vjen nga Kosova, është i pasaktë.
Udhëheqësi sirian nuk ka deklaruar një gjë të tillë dhe faktet e gjetura nuk e vërtetojnë pretendimin.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
