Disa media online në Kosovë kanë publikuar një deklaratë të deputetit të Partisë Demokratike të Kosovës (PDK) Bekim Haxhiut, i cili sot (27 janar) në seancën e sotme të Kuvendit të Kosovës ka thënë se Qeveria Kurti është përpjekur që të paraqesë shifra të rrejshme të të infektuarve me Covid-19.
Ai shtoi se gjatë muajit dhjetor të vitit të kaluar dhe janar të këtij viti, ka pasur përpjekje për të paraqitur shifra të rrejshme me COVID-19, duke e zvogëluar numrin e rasteve të reja, por pa ofruar asnjë fakt që e mbështetë pretendimin e bërë.
Deklarata e Haxhiut e publikuar në disa media online në Kosovë:
“As pas dy vite të pandemisë Qeveria e Kosovës nuk arrin të dalloj variante të COVID-19, sillet me neglizhencë dhe papërgjegjësi pavarësisht situatës pandemike. Gjatë muajit dhjetor dhe në fillim të janarit 2022 kishte përpjekje nga qeveria që të paraqiten shifra të rrejshme me COVID duke i zvogëluar ato, duke i kamufluar me grip sezonal pasi simptomatologija e Omicron dhe gripit sezonal ishte e njejtë. Kemi me dhjetëra raste kur pacientët me simptoma të Omicronit u është dhënë terapia pa i udhëzuar për të bërë testin për COVID. Këta persona kanë lëvizur lirshëm dhe janë shndërruar në shpërndarës të virusit duke e rritur shpejtësinë e numrit të rasteve pozitive”, ka deklaruar Haxhiu.
Këtë pretendim të Haxhiut e kanë publikuar disa nga mediat online në Kosovë si “Periskopi.com”, “Gazetainfokus.com”, “Indeksonline.net” dhe “Kosova-sot.info” , vegëzat e të cilave mund t’i gjeni këtu, këtu, këtu dhe këtu).
Analiza:
Deputeti i PDK-së Bekim Haxhiu ka pretenduar pa fakte se gjatë muajit dhjetor dhe në fillim të janarit 2022 kishte përpjekje nga qeveria që të paraqiten shifra të rrejshme me COVID duke i zvogëluar ato.
Ky pretendim i Haxhiut i pa bazuar në asnjë fakt është publikuar në disa nga mediat online në Kosovë.
Në këtë rast, bazuar në metodologjinë e punës, Hibrid.info e vlerëson këtë pretendim të Haxhiut si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
