Shkroi: Etrit Rexhepi
“Aeroporti i Gjakovës do të funksionalizohet me dy shërbime bazë, kargo dhe për udhëtime me kosto të ultë”.
Ky ishte një nga premtimet e Lëvizjes Vetëvendosje (LVV) në fushatën e zgjedhjeve të jashtëzakonshme të 14 shkurtit, të vitit 2021, i potencuar nga Albin Kurti, kandidati për kryeministër nga radhët e këtij subjekti politik.
Çka ndodhi me premtimin?
Hibrid.info ka gjetur se ky premtim nuk është përfshirë në programin qeverisës, madje Qeveria aktuale e udhëhequr nga LVV ka nisur procedurat për funksionalizimin e këtij aeroporti, për qëllime të mbrojtjes, ndryshe nga ishte premtuar fillimisht.
Analiza:
Aeroporti i Gjakovës, pas luftës së viteve 1998/99, është rindërtuar nga misioni i NATO-s në Kosovë, KFOR, konkretisht nga trupat italiane që shërbejnë në kuadër të misionit dhe është përdorur për mbështetjen e aktiviteteve ushtarake të NATO-s.
Në vitin 2013, në mbledhjen e kabinetit qeveritar, kohë kur në krye të qeverisë, ishte Hashim Thaçi, u themelua një komision qeveritar me qëllim që të mbikëqyrë procedurat e kalimit të Aeroportit Ushtarak të Gjakovës, nga Ministria e Mbrojtjes së Italisë te Qeveria e Kosovës (shih këtu).
Hibrid.info ka gjetur një artikull të publikuar në vitin 2013, në “ekonomia.info”, portal me përmbajtje në gjuhën shqipe, ku ishte raportuar për vendimin në fjalë. Nga njoftimi brenda artikullit për diskutimet brenda kabinetit qeveritar, bëhet e qartë se qysh atëherë ekzistonin opinione të ndryshme rreth qëllimit të shfrytëzimit të këtij aeroporti (shih këtu).
Por, më 18 prill, në vitin 2019, në mbledhjen e Qeverisë së Kosovës, të udhëhequr nga kryeministri Ramush Haradinaj, u vendos që Aeroporti i Gjakovës të kalojë në shfrytëzim të Forcës së Sigurisë së Kosovës (shih këtu).
Hibrid.info ka hulumtuar dhe verifikuar me anë të makinave të kërkimit, dhe ka gjetur se në video-materialin e publikuar në faqen e kryeministrit Albin Kurti, në Facebook, më 2 shkurt, 2021, nga minuta e 31:54, mund ta shihni e dëgjoni se Kurti përmend premtimin e trajtuar në këtë artikull (shih këtu).
Premtimi ishte përfshirë në pjesën e programit zgjedhor për transportin dhe me funksionalizimin e këtij aeroporti parashiheshin dy shërbime bazë: kargo (bartës ngarkesash) dhe udhëtime me kosto të ulët.
Plani për funksionalizimin e Aeroportit të Gjakovës, nuk u bë pjesë e programit qeverisës të mandatit 2021-2025, të prezantuar nga kryeministri Kurti, e të miratuar në maj të vitit 2021 (shih këtu dhe këtu).
Dy vite më vonë, Armend Mehaj, ish-ministri i Mbrojtjes, njoftoi me anë të një konference për media se ka filluar funksionalizimi i Aeroportit të Gjakovës për qëllime të mbrojtjes (shih këtu).
Në hulumtimet tjera, nuk janë gjetur njoftime nga institucionet kompetente, të cilat do ta bënin më të qartë situatën rreth mbarëvajtjes së procedurave për funksionalizimin e këtij aeroporti (shih këtu).
Hibrid.info ka hulumtuar përmes makinës së kërkimit, “Google” për artikuj në lidhje me këtë çështje. I vetmi raportim medial i gjetur, që është publikuar gjatë këtij viti (21 gusht), është një tekst i portalit në gjuhën shqipe “AlbanianPost.com”, ku është treguar se ky premtim nuk është përmbushur (shih këtu).
Po ashtu me anë të “Google Earth”, nga një fotografi satelitore e shkrepur më 15 shkurt të vitit 2023, mund të vërehet gjendja jo funksionale e Aeroportit të Gjakovës (shih këtu).
Përfundimi:
Premtimi për funksionalizimin e Aeroportit të Gjakovës me dy shërbime bazë: kargo dhe udhëtime me kosto të ulët, nuk është realizuar.
Megjithë premtimin, ky zotim nuk është përfshirë në programin qeverisës të LVV-së, madje plani i bërë publik për në të ardhmen, parasheh funksionalizim të këtij aeroporti për qëllime të mbrojtjes.
Bazuar në metodologjinë e punës mbi përmbushjen apo mbajtjen e premtimeve, mos funksionalizimin e Aeroportit të Gjakovës për kargo dhe udhëtime me kosto të ulët, hibrid.info e vlerëson si “premtim jo të mbajtur”.
Arsyetimi:
Përmbushja apo mbajtja e premtimeve, kryesisht ndërlidhet me ato parazgjedhore, të cilat monitorohen në nivelin qendror dhe atë lokal gjatë mandatit katër-vjeçar. Ky hulumtim bëhet kryesisht në kohën e fushatës parazgjedhore, ku figurat kryesore politike monitorohen, në mënyrë që të ketë kontroll të fakteve për atë që e thonë. Hibrid.info bazuar në premtimet e bëra më herët, përmes programit zgjedhor, i kontrollon deklaratat e këtyre politikaneve, për të parë nëse pas mandatit kanë arritur t’i mbajnë ato premtime. Hibrid.info planifikon që të publikojë raporte të tilla edhe në baza vjetore.
Vlerësimi në këtë kategori bëhet – mbajtje e premtimit (nëse ai mbahet), mbajtje e pjesshme e premtimit dhe premtim jo i mbajtur (nëse ai nuk mbahet).
