Portali “kosova-sot.info” ka publikuar një artikull me titull “Qeveria vendosi, orë policore do të ketë deri më 1 qershor!”.
Hibrid.info pas verifikimit të fakteve ka vërejtur se titulli i këtij artikulli është përgjithësues. Lajmi vërehet se në mënyrë të veçantë paraqet propozimin e Qeverisë së Maqedonisë së Veriut, të miratuar nga Komisioni për Sëmundje Ngjitëse i këtij shteti, që të vazhdohen masat kufizuese, ku parashihet që ora policore të vazhdohet deri më 1 qershor, në formatin e njëjtë. Do të fillojë në ora 00:00 dhe do të mbarojë në ora 04:00.
Gjithashtu në artikullin e “Kosova-sot.info” mungon fotografia që ilustron ngjarjen apo vendin (shtetin).
Duke pasur parasysh se portali “kosova-sot.info” publikon përmbajtje në gjuhën shqipe dhe se shumicën dërmuese të lexuesve i ka nga Kosova, artikulli me titull përgjithësues e jo sqarues, mund t’i dezinformojë lexuesit, duke lënë të kuptohet se bëhet fjalë për orën policore në Kosovë.
Pjesë nga teksti i artikullit të publikuar në “kosova-sot.info”:
Qeveria e Maqedonisë së Veriut ka miratuar propozimin e Komisionit për Sëmundje Ngjitëse, që të vazhdohen masat restriktive.
Me këtë vendim, parashihet që ora policore të vazhdohet deri më 1 qershor, në formatin e njëjtë. Do të fillojë në ora 00:00 dhe do të mbarojë në ora 04:00.
Vegëza e artikullit të publikuar në “kosova-sot.info”:
https://www.kosova-sot.info/lajme/544878/qeveria-vendosi-ore-policore-do-te-kete-deri-me-1-qershor/
Analiza:
Portali “Kosova-sot.info” ka publikuar një artikull që ka të bëjë me miratimin e propozimit nga Komisioni për Sëmundje Ngjitëse në Maqedoninë e Veriut, që të vazhdohen masat restriktive anti-Covid, ndërsa në titull nuk sqaron se për cilin vend bëhet fjalë. Po ashtu këtij artikulli i është vënë fotografi që nuk e ilustron ngjarjen.
Kjo lë të kuptohet se lajmi ka të bëjë me Kosovën, duke e ditur se ky medium është i regjistruar dhe shumica e audiencës janë nga po i njëjti shtet, meqenëse se portali në fjalë, fillimisht ka qenë e përditshme e shtypur në Kosovë.
Pas kontrollit të fakteve bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
