Shkroi: Etrit Rexhepi
Nëpërmjet një titulli është pretenduar se ushtria amerikane ka menduar qe një kohë të gjatë që të largohet nga Kosova.
“Bondsteel, amerikanët kanë menduar të largohen nga Kosova për një kohë të gjatë”, mban titullin artikulli i publikuar të premten (7 shkurt) nga portali në gjuhën shqipe “ntv.al”.
E vërteta?
Përderisa titulli e paraqet si fakt të kryer çështjen që “amerikanët kanë menduar të largohen nga Kosova për një kohë të gjatë”, në bazë të artikullit sqarohet se bëhet fjalë për një opinion të një analisti ushtarak serb.
“Analisti ushtarak Aleksandër Radiç deklaroi se SHBA-ja ka kohë që po shqyrton mundësinë e tërheqjes së forcave të saj nga KFOR-i dhe përfshirja më e madhe e Turqisë duhet të interpretohet si dëshirë që Kosova të bëhet një pikë strategjike në Ballkanin Perëndimor”, shkruan në hyrje të artikullit.
Hibrid.info ka verifikuar deklaratën e thënë nga Radiq dhe ka gjetur se deklarata e tij, e publikuar në “ntv.al” është marrë nga portali në gjuhën serbe “kosovo-online.com”. Artikulli në këtë portal është publikuar më 4 shkurt me titull “Radiq: Rrëfimi i Bondsteelit – një mit kombëtar serb, amerikanët kanë menduar qe një kohë të gjatë për largim nga Kosova”.
Artikulli i “ntv.al” përdor fotografi të disa ushtarëve.
Kampi Bondsteel është selia operative e misionit KFOR në Kosovë. Ndodhet afër Ferizajt. Kryesohet nga Ushtria e Shteteve të Bashkuara të Amerikës. (shih këtu)
Analiza:
Nëpërmjet një titulli të publikuar nga “ntv.al” është pretenduar se ushtria amerikane qe një kohë të gjatë e ka menduar largimin nga Kosova.
Por përderisa titulli e paraqet si fakt të kryer pretendimin, artikulli sqaron se bëhet fjalë për deklaratë të një analisti ushtarak serb.
Bazuar në metodologjinë e punës, hibrid.info e vlerëson këtë titull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
