Shkroi: Etrit Rexhepi
Është publikuar në platformën sociale “X” një video që shfaq disa zyrtarë policorë teksa kapin një person i cili po tentonte të thyente derën e një shtëpie.
Në publikimin e llogarisë në gjuhën angleze “VukFeNix” pretendohet se i dyshuari është një shqiptar imigrant ilegal teksa tenton të futet në një shtëpi në Britaninë e Madhe për të kryer grabitje.
E vërteta?
Pas verifikimit të fakteve nga hibrid.info, del se videoja është e vjetër, e vitit 2018. E në raportimet e asaj kohe nuk ishte bërë e ditur se i dyshuari është shqiptar imigrant ilegal.
Pretendimi në “X”:
“Një kamerë e sigurisë ka kapur një imigrant ilegal shqiptar teksa hynte në një shtëpi në Mbretërinë e Bashkuar. Drejtësia u vendos shpejt”
Si raportohej më 2018?
Më 28 shkurt 2018, mediat në gjuhën angleze “dailymail.co.uk”, “thesun.co.uk” dhe “mirror.co.uk” kishin raportuar për ngjarjen duke u bazuar në videon që ishte publikuar në Facebook. E asnjëra nga to nuk kishin njoftuar për origjinën e të dyshuarit. Sipas raportimeve, ngjarja kishte ndodhur në Glasgow të Policisë. Madje, “mirror.co.uk” ka shkruar se pamjet besohen të jenë nga Skocia, “bazuar në theksin e zyrtarëve dhe të dyshuarit”.
Hibrid.info edhe në të kaluarën ka trajtuar përmbajtje të publikuara nga llogaria e njëjtë. Janë të paktën tri publikime të trajtuara me pretendime për vepra krimi nga shqiptarët në vende të ndryshme të botës. (Shih këtu, këtu dhe këtu)
Analiza:
Në një video të publikuar në X është pretenduar se si policia në Britaninë e Madhe e ka kapur gjatë tentimit për grabitje një të dyshuar shqiptar imigrant.
Pas verifikimit të fakteve, del se videoja ishte bërë virale më 2018. Në raportimet e asaj kohe, siç ka gjetur hibrid.info, nuk është përmendur fare kombësia e të dyshuarit.
Bazuar në metodologjinë e punës, hibrid.info e vlerëson këtë pretendim si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
