Shkroi: Fatbardh Dema
Përmes një postimi është pretenduar për një sondazh të kryer lidhur me partitë politike në Kosovë, në prag të zgjedhjeve parlamentare të 9 shkurtit.
Ky postim u publikua dje (29 tetor) në TikTok nga llogaria “tavnikcitypdk”.
Në fotografi, që pretendohet të jenë rezultatet e një sondazhi, Lëvizja Vetëvendosje (LVV) del të jetë e para me 31 për qind, Partia Demokratike e Kosovës (PDK) me 28 për qind, Lidhja Demokratike e Kosovës (LDK) me 23 për qind, Aleanca për Ardhmërinë e Kosovës (AAK) me 8 për qind dhe Komunitetet me 10 për qind.
E vërteta?
Hibrid.info ka hulumtuar përmes makinës online të kërkimit “Google”, duke kërkuar me fjalët kyçe “sondazhi i fundit për zgjedhjet në Kosovë” dhe “LVV 31%, PDK 28%, LDK 23%, AAK 8% dhe Komunitetet 10%”. Mirëpo, rezultatet nuk shfaqin një sondazh të tillë.
Publikimi i këtij sondazhi deri në momentin e trajtimit nga hibrid.info i ka marrë mbi 18 mijë shikime dhe mbi 180 komente. (shih këtu)
Rreth sondazheve
Dy sondazhet për të cilat ka pasur publikime muajve të fundit janë ai i prillit, kur “reporteri.net” publikoi disa të dhëna për të cilat raportoi se janë marrë nga një sondazh i kryer nga kompania “UBO Consulting” dhe ai qershorit kur “albanianpost.com” publikoi sondazh të realizuar nga kompania “Source” në bashkëpunim me këtë portal. Të dhënat e dy sondazheve tregonin përqindje tjera.
Javëve të fundit janë shtuar publikimet me pretendime të rreme për sondazhe për zgjedhjet e 9 shkurtit. Hibrid.info ka verifikuar disa të tilla (shih disa këtu, këtu, këtu dhe këtu).
Analiza:
Llogaria me emrin “tavnikcitypdk” në TikTok ka pretenduar për publikimin e një sondazhi të fundit.
Hibrid.info ka përdorur “google.com” dhe ka verifikuar se nuk ka pasur asnjë publikim me pretendimin e tillë në asnjë burim kredibil informacioni.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
