Shkroi: Fatbardh Dema
Pretendohet se makineria HAARP ndryshon klimën, krijon stuhi, tërmet e vullkan, si dhe krijon tharje të tokës.
Ky pretendim u publikua në median sociale TikTok nga llogaria “gentianlleshi11”.
Cila është e vërteta?
Pas kontrollit të fakteve, hibrid.info ka vërtetuar se ky pretendim është i pasaktë. HAARP është Programi Kërkimor Aktiv Auroral me frekuencë të lartë, që është përpjekje shkencore e cila synon studimin e vetive dhe sjelljes së jonosferës.
Vegëza e video-materialit të publikuar në TikTok nga llogaria “gentianlleshi11”:
https://www.tiktok.com/@gentianlleshi11/photo/7358094318311181601
Pas hulumtimit të kryer përmes makinave online të kërkimit, hibrid.info ka gjetur informacione në ueb-faqen zyrtare të këtij Programi Kërkimor (HAARP), në të cilën sqarohet se në kuadër të programit, kryhen kërkime për karakteristikat dhe sjelljen e jonosferës. (shih këtu)
Në video-materialin e publikuar nga llogaria “gentianlleshi11”, përveç pretendimit, shfaqet edhe një fotografi në të cilën paraqitet një pajisje e madhe, e cila duket se është pjesërisht e mbuluar me një pëlhurë gome të bardhë.
A është kjo pajisje pjesë e HAARP?
Për të zbuluar origjinën e fotografisë, hibrid.info kërkoi përmes programit të automatizuar InVID dhe rezultatet tregojnë se pajisja që shihet në fotografi nuk është pjesë e HAARP.
Gjetjet çojnë në ueb-faqen “Popularmechanics.com” në të cilën paraqiten fotografi të kësaj pajisjeje.
Në këtë ueb-faqe jepen sqarime se pajisja në fjalë është një radar i quajtur SBX, i cili është projektuar për të zbuluar kokat e raketave balistike. (shih këtu)
Po ashtu fotografia e kësaj pajisjeje u gjet e publikuar edhe në ueb-faqen “media.ellinikahoaxes.gr” (shih këtu). Në përshkrimin e kësaj fotografie shkruan “Skuadra e ndërtimit dhe vendosjes së radarit qëndron përpara radarit SBX në Ingleside, Texas”.
Analiza:
U pretendua se Programi Kërkimor (HAARP) është në gjendje të ndryshojë klimën, të krijojë stuhi, tërmet e vullkan.
Hibrid.info vërtetoi se pretendimi është i rremë. HAARP është një Program Kërkimor përmes së cilit kryhen kërkime për karakteristikat dhe sjelljen e jonosferës.
Po ashtu, në këtë pretendim të bërë në TikTok, pretendohet se fotografia paraqet pajisje të Programit Kërkimor (HAARP). Por, gjetjet tregojnë se në fotografi paraqitet radari i quajtur SBX, i cili është projektuar për të zbuluar kokat e raketave balistike.
Bazuar në metodologjinë e punës, hibrid.info e vlerëson këtë pretendim të bërë në TikTok si “Teori Konspirative”.
Arsyetimi:
Vlerësim si “Teori konspirative” marrin ato përmbajtje informative të cilat në vete përmbajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre përmbajtje është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
