Portali informativ me emrin “info-albania.com” ka publikuar një artikull me titull “’Kush është Federata Shqiptare?’, Poçetino kur e pyesin për Brojën: Njoh vetëm Silvinjon dhe Zabaletën”
Titulli i shkruar në këtë mënyrë lë të nënkuptojë se Mauricio Pochetino, trajneri i Chelsea-s, skuadrës angleze të futbollit, është deklaruar se nuk ka njohuri rreth Federatës Shqiptare të Futbollit (FSHF), në momentin kur ka shtruar pyetjen: “Kush është Federata Shqiptare?”
Megjithatë, hibrid.info ka gjetur se pyetja e trajnerit argjentinas është nxjerrë nga konteksti, pyetje të cilën më pas e sqaron Pochetino.
Vegëza e artikullit të publikuar në portalin “info-albania.com”:
Në një konferencë për media trajneri Pochettino është pyetur në lidhje me deklaratat e bëra nga Federata Shqiptare për Armando Brojën, futbollistin e kombëtares shqiptare dhe të skuadrës së cilën e drejton Pochetino.
Hibrid.info ka vërtetuar se, ndonëse trajneri argjentinas, ashtu edhe si është pretenduar në titullin e artikullit të lartë-përmendur, ka vënë në pikëpyetje se kush është Federata Shqiptare, Pochettino më pas e ka sqaruar edhe më tej pyetjen duke dashur të dije më saktësisht se nga kush ka ardhur deklarimi i Federatës Shqiptare.
Për të mos lënë vend për keqkuptime, trajneri i Chelseas ka deklaruar se i njeh trajnerët e kombëtares shqiptare dhe se ka marrëdhënie të mira me ta. (shih këtu)
Deklarata e Maurici Pochettinos:
“Kush e tha këtë? Kush është Federata Shqiptare? Presidenti, trajneri? Nuk e kam dëgjuar. Ka respektin tim. Njoh Silvinjon dhe Zabaletën, trajnerët në Shqipëri dhe kam një marrëdhënie të mirë, por jo, jo ende, jo ende”.
Po ashtu hibrid.info ka gjetur artikull edhe nga mediat britanike, ku vërtetohet deklarimi i trajnerit Mauricio Pochettino. (shih këtu)
Analiza:
Portali informativ “info-albania.com” ka publikuar një artikull në lidhje me një deklaratë të trajnerit të Chelsea-t, Maurico Pochettino për futbollistin e kombëtares shqiptare, Armando Broja.
Titulli i artikullit pretendon se trajneri argjentinas nuk ka njohuri rreth Federatës Shqiptare, por që hibrid.info ka vërtetuar se deklarimi i Pochettinos është nxjerrë nga konteksti.
Bazuar në metodologjinë e punës, hibrid.info e vlerëson këtë artikull si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.
