Shkroi: Etrit Rexhepi
Llogaria në Facebook me emrin “Lule Gjeli” ka publikuar më 13 prill një imazh ku paraqiten kancelari gjerman, Olaf Scholz dhe presidenti i SHBA-së, Joe Biden pranë njëri tjetrit.
Fotografisë së publikuar i është vendosur mbishkrimi “Kancelari gjerman ne takim me Presidentin amerikan folën edhe për Kosovën”.
Por, pas verifikimit të fakteve nga hibrid.info, është gjetur se imazhi paraqet momentin e takimit ndërmjet dy liderëve më 3 mars të vitit 2023. Po ashtu hera e fundit kur janë takuar Biden dhe Scholz, ishte në shkurt të këtij viti.
Vegëza e imazhit të publikuar nga llogaria “Lule Gjeli” në Facebook:
https://www.facebook.com/photo?fbid=975889437578203&set=a.114623383704817
Llogaria “Lule Gjeli” në Facebook numëron 5 mijë e 700 ndjekës (shih këtu).
Pas hulumtimit me anë të programit të automatizuar të kërkimit “InVID”, hibrid.info ka gjetur se ky imazh është shkrepur nga takimi i realizuar më 3 mars të vitit 2023, ndërmjet kancelarit gjerman, Olaf Scholz dhe presidentit të SHBA-së, Joe Biden (shih këtu dhe këtu).
Hibrid.info po ashtu ka kontrolluar edhe ueb-faqen e “Shtëpisë së Bardhë”, ku në mesin e publikimeve ka gjetur edhe njoftimet për takimet e realizuara ndërmjet dy liderevë në mars të vitit 2023-së (këtu) dhe të fundit, në shkurt të këtij viti (këtu).
Nga verifikimi i dy njoftimeve, nuk konfirmohet se Kosova ishte temë diskutimi e këtyre takimeve.
Analiza:
Pretendimi se kancelari gjerman, Olaf Scholz dhe presidenti i SHBA-së, Joe Biden janë takuar dhe kanë diskutuar për Kosovën, nuk është i vërtetë.
Hibrid.info ka vërtetuar se imazhi është marrë nga takimi i dy liderëve në shkurt të vitit 2023. As në këtë takim e as në takimin e zhvilluar në shkurt 2024 ndërmjet Scholz dhe Biden, nuk ishte diskutuar për Kosovën.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
