Është prezantuar episodi i dytë i emisionit “Prapa Ekraneve”. Emisioni do të vazhdojë të shfaqet një herë në muaj për rreth 30 minuta, ku do të trajtohen tema që ndërlidhen me çështjet e çrregullimit informativ.
Përgjatë minutave të emisionit, ekipi i Hibrid.info përmes moderatorit Uran Haxha sjell të rejat rreth informimit dhe shkaqet e arsyet që sollën keqinformim për audiencën kosovare.
Përmes “Prapa Ekraneve”, u fol për keqinterpretimin nga gabimi në përkthim të deklaratës së Emmanuel Macron, pas mbajtjes së Samitit të Procesit të Berlinit rreth liberalizimit të vizave dhe gabimi në raportim i mediave për këtë çështje. Si u raportua për ngjarjen e 24 shtatorit në Banjskë? Si u përdorën imazhe të ushtarëve rus e nga Azerbajxhani për ta mbuluar këtë ngjarje nga faqe të ndryshme në media sociale? Por edhe cila ishte narrativa e mediave pro-qeveritare serbe për këtë ngjarje.
Në kuadër të emisionit jepet një pasqyrë për audiencën në lidhje me termet e çrregullimit informativ, tregohet se çka janë mediat reale e çka janë mediat e dyshimta si dhe bëhet një përmbledhje nga raporti i hibrid.info për muajin shtator.
Në pjesën e dytë të emisionit i ftuari Burim Ramadani, ekspert i sigurisë, foli për rrezikshmërinë e dezinformatave për sigurinë kombëtare.
E fare në fund, rubrika e tretë që merret me edukimin medial e digjital, trajtoi në detaje funksionin e algoritmit në media sociale. Shikuesit u informuan se si funksionon algoritmi në sjelljet e tyre gjatë përdorimit të mediave sociale dhe si e përcakton rrjedhën e përmbajtjeve keqinformuese.
“Prapa Ekraneve” realizohet me mbështetjen e Institutit Kombëtar Demokratik (NDI) dhe Agjencisë së Shteteve të Bashkuara për Zhvillim Ndërkombëtar (USAID), në Kosovë. Opinionet e shfaqura në këtë emision nuk pasqyrojnë domosdoshmërisht pikëpamjet dhe qëndrimet e NDI dhe USAID.