Portali në gjuhën serbe “Kosovo-online.com” sot (24 mars) ka publikuar një artikull për 23 vjetorin e bombardimeve të NATO-s, duke e përshkruar si agresion ndaj Serbisë, Republikës Federale të atëhershme të Jugosllavisë.
Megjithatë, në këtë artikull është vendosur fotografi jo adekuate, ku shihen momente të bombardimeve, që mediumi në gjuhën serbe pretendon se janë të imazhe të fushatës së bombardimeve të aleancës së NATO-s ndaj ushtrisë serbe (atëherë jugosllave) gjatë luftës në Kosovë, në vitin 1999.
Hibrid.info ka hulumtuar lidhur me këtë fotografi, dhe ka vërtetuar se kjo nuk ka të bëjë me bombardimet e NATO-s, por është e vitit 2003, gjatë luftës në Irak.
Vegëza e artikullit të publikuar në portalin në gjuhën serbe “Kosovo-online.com”:
Pas hulumtimit përmes makinave të kërkimit, hibrid.info ka gjetur këtë fotografi që tregon imazhe nga shpërthimet në Bagdad (Irak) në vitin 2003, e publikuar në mediumet amerikane si “CNN” (fotografia numër 3) dhe “MSN.com” (fotografia numër 3). (shih këtu dhe këtu)
Këtë imazh, ditë më parë (17 mars), e ka publikuar edhe Ambasada e Rusisë në Afrikën e Jugut në llogarinë e tyre në Twitter, duke e krahasuar luftën në Ukrainë me atë të Kosovës, me pretendim të rremë se janë imazhe të fushatës së bombardimeve të aleancës së NATO-s ndaj ushtrisë serb.
Edhe ky postim i ambasadës ruse në Afrikë të Jugut është verifikuar nga stafi i hibrid.info. (shih këtu)
Analiza:
Media online në gjuhën serbe “Kosovo-online.com” ka publikuar një artikull lidhur me 23 vjetorin e bombardimeve të NATO-s, duke ilustruar me fotografi jo adekuate.
Por, pas hulumtimit të kryer nga hibrid.info, është arritur të gjendet kjo fotografi e cila i takon vitit 2003 që paraqet imazh nga shpërthimet në Irak.
Pas verifikimit të fakteve bazuar në metodologjinë e punës, hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.