Mediat online “Telegrafi.com” dhe “Euronews Albania” kanë publikuar dje një artikull me pamjet e një ndërtese të cilës i shkëputet një pjesë dhe i bie në rrugë, me pretendimin se kjo ndërtesë është në Turqi dhe se pamjet janë të pas tërmetit që goditi këtë shtet mëngjesin e 6 shkurtit.
Pas verifikimit të fakteve, bazuar në hulumtimit e kryer përmes makinave online të kërkimit, hibrid.info ka arritur të vërtetojë se kjo ndërtesë nuk është në Turqi, rrjedhimisht pamjet nuk janë nga tërmeti që e goditi këtë shtet mëngjesin e 6 shkurtit.
Bazuar në gjetjet nga hulumtimi i kryer, hibrid.info ka vërtetuar se kjo ndërtesë është në Japoni dhe video-materiali është realizuar gjatë tërmetit që kishte ndodhur në prill të vitit 2016.
Vegëza e artikullit të publikuar në mediumet online “Telegrafi.com” dhe “Euronews Albania”:
https://euronews.al/video-momenti-kur-ndertesa-shumekateshe-ndahet-ne-mes-dhe-bie-ne-rruge-ne-turqi/
Përveç këtyre mediave online, ky artikull është publikuar më pas edhe nga disa portale në gjuhën shqipe si “Dosja.al” dhe “Gazetatema.net”.
Këto media online, këtë artikull e kanë bazuar në një video amatore të shpërndarë në Twitter, e cila më, pas siç duket është fshirë nga ky medium social. (shih këtu)
Pas hulumtimit të kryer përmes programit te automatizuar online “InVID”, hibrid.info ka arritur të gjejë artikullin e publikuar në ueb-faqen në gjuhën japoneze “blog.goo.ne.jp”, ku qartësohet pamjet e kësaj ndërtese janë të muajit prill 2016. (shih këtu)
Analiza:
Disa media online në gjuhën shqipe kanë publikuar një artikull me pamjet e një ndërtese, të cilës i shkëputet një pjesë gjatë dridhjeve të tërmetit.
Mediat e lartcekura kanë hedhur pretendimin (duke u bazuar në një video në Twitter), se pamjet janë nga tërmeti i 6 shkurtit në Turqi.
Mirëpo, pas verifikimit të fakteve, hibrid.info ka vërtetuar se pamjet janë nga tërmeti i vitit 2016 në Japoni.
Bazuar në metodologjinë e punës, hibrid.info e vlerëson këtë artikull si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre raporteve mediatike që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur konfirmojnë të njëjtat për shkak të mungesës ose mos-posedimit të burimeve të besueshme.