Llogaria në TikTok me emrin “lumjanana009” ka publikuar dje (23 prill) një video-material (15 sekonda) me pretendimin se nga sulmet e grupit të mercenarëve rus “Wagner” kanë mbetur të plagosur shtatë pjesëtarë të Policisë së Kosovës në veri të Mitrovicës.
Llogaria e lartcekur, në këtë video-material përveç një imazhi që paraqet disa pjesëtarë të Policisë së Kosovës, ka vendosur edhe mbishkrimin “PLAGOSEN 7 POLICE NE MITROVIS SOT NGA SULMET E GRUPIT WAGNER RUSE NE VERI”.
Pas verifikimit të fakteve të kryer nga hibrid.info, është vërtetuar se pretendimi i bërë nga kjo llogari në TikTok është i rremë.
Hibrid.info pas hulumtimit të kryer përmes makinave online të kërkimit dhe mediave sociale, nuk ka gjetur asnjë raportim të publikuar lidhur me këtë ngjarje në ndonjë nga mediumet në Kosovë.
Vegëza e video-materialit të publikuar në TikTok nga llogaria “lumjanana009”:
Video-materiali i publikuar dje (23 prill), deri në publikimin e këtij artikulli, ka arritur të grumbullojë mbi 80 mijë shikime. (shih fotografinë më poshtë)
Llogaria e lartcekur siç duket këtë pretendim të rremë është munduar ta ndërlidhë me procesin zgjedhor në katër komunat veriore të Kosovës, të mbajtura dje (23 prill). (shih këtu)
Lidhur me procesin zgjedhor, Policia e Kosovës përmes një njoftimi ka bërë të ditur se zgjedhjet e mbajtura në katër komunat veriore, në aspektin e sigurisë kanë kaluar pa asnjë incident. (shih këtu njoftimin e Policisë së Kosovës)
Analiza:
Pas verifikimit të fakteve, hibrid.info ka vërtetuar se llogaria “lumjanana009” në TikTok ka publikuar një video-material me pretendimin e rremë se grupi rus “Wagner” ka plagosur shtatë pjesëtarë të Policisë së Kosovës në veri të Mitrovicës.
Bazuar në metodologjinë e punës, hibrid.info e vlerëson këtë pretendim si “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.