Një portal i dyshimtë me përmbajtje në gjuhën shqipe ka publikuar një artikull me titull “Befason bora deri në një metër në një pjesë”.
Pas verifikimit të fakteve të kryer nga hibrid.info, është vërtetuar se titulli i artikullit është përgjithësues, që nuk sqaron se për cilin vend bëhet fjalë dhe se kjo ngjarje nuk është aktuale.
Lajmi qartësohet vetëm në fund të artikullit, ku thuhet se “Në Sunnegga afër Zermatt VS. Imazhet e ueb-kamerës tregojnë: Aty ku dje kishte livadhe të gjelbra dhe mund të ecje, sot ka borë”.
Vegëza e artikullit të portalit të dyshimtë “belmouth.com”:
Ky artikull është shpërndarë nga faqe të shumta në median sociale në Facebook, të cilat janë në gjuhën shqipe, gjë që mund të shtyjë audiencën të mendojë se po flitet për reshje bore në ndonjë vend shqip-folës. (shih këtu, këtu, këtu, këtu dhe këtu)
Hibrid.info gjatë kërkimeve ka gjetur artikullin origjinal të publikuar më 28 gusht të vitit të kaluar nga mediumi me përmbajtje në gjuhën shqipe “albinfo.at” me seli në Zvicër. (shih këtu)
Në artikull tregohet se reshjet e borës kanë ndodhur në pikën turistike Zermatt, në Zvicër.
Analiza:
Pas verifikimit të fakteve të kryer nga hibrid.info, është vërtetuar se një portal i dyshimtë në gjuhën shqipe ka publikuar një artikull të vjetër për reshje bore në Zvicër, por që në titull nuk sqaron se në cilin shtet ka ndodhur ngjarja, duke nënkuptuar mundësinë e ngjarjes në territorin e ndonjërit prej shteteve shqip-folëse në rajon për shkak të audiencës që ka.
I njëjti artikull është shpërndarë nga faqe të ndryshme shqipe në median sociale Facebook.
Në bazë të metodologjisë së punës, hibrid.info këtë artikull e vlerëson si “clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
