Pretendimi i mediave serbe se e moshuara ishte serbe shpërndahet edhe nga mediat spanjolle.
Dezinformata lidhur me identitetin etnik të gruas së moshuar e dhunuar fizikisht në shtëpinë e pleqve ka zënë hapësirë edhe në disa media spanjolle.
Mediumet spanjolle “Telecinco.es”, “Marca.com”, dje (3 nëntor) kanë publikuar artikuj me pretendimin se e moshuara e dhunuar është e komunitetit serb.
Artikujt e publikuar në mediumet spanjolle mbajnë titullin “E tmerrshme: pamjet e keqtrajtimit të një infermiereje shqiptare ndaj një të moshuare serbe në Kosovë” dhe “Pamjet tronditëse të një infermiereje shqiptare që keqtrajton një të moshuar serbe”.
Përveç në tituj edhe në përmbajtje të artikujve pretendohet se identiteti etnik i të moshuarës është serbe.
Vegëzat e artikujve të publikuara në mediat spanjolle “Telecinco.es” dhe “Marca.com”:
https://www.marca.com/tiramillas/actualidad/2022/11/03/6363ee6d268e3e39568b457d.html
Pjesë të artikujve të publikuar në media spanjolle:
Imazhet janë të tmerrshme dhe tregojnë karakterin moral të një infermiereje dhe ka mundësi që urrejtja racore, sërish, në Kosovë. Është sulmi ndaj një gruaje të moshuar në një shtëpi të të moshuarve në Kosovë. Një shqetësim që rihap plagë të rënda. Infermierja është shqiptare, e moshuara serbe, vendbanimi është në Kosovë. Një territor që për Serbinë u përvetësua nga shqiptarët e Kosovës. (telecinco.es)
Padyshim një nga videot më rrëqethëse deri më tani këtë vit. Në të shihet një infermiere shqiptare, e cila punon në një shtëpi të të moshuarve në Kosovë , duke keqtrajtuar një grua të moshuar me origjinë serbe , në atë që pritet të jetë një sulm i ri mbi baza racore (etnike). (marca.com)
Kjo dezinformatë ka zënë hapësirë edhe në disa mediume tjera në gjuhën spanjolle si “Headtopics.com (espana)” dhe “La Opinion de Murcia”. (këtu, këtu)
E moshuara (Minire Nura) e dhunuar fizikisht nga infermieret në shtëpinë e të moshuarve ne Pejë, është e banore e Kosovës, e komunitetit shqiptar. Në raportimet e djeshme të mediave kosovare, shihet se si e moshuara me mbiemrin Nura, u zhvendos në shtëpinë e vajzës së saj. Diskutimi mes të moshuarës Nura dhe vajzës së saj bëhet, që dokumentohet përmes një video-përmbajtje (këtu), bëhet në gjuhën shqipe.
Mbiemrin Nura e mbajnë vetëm qytetarët e nacionalitetit shqiptar në Kosovë (këtu). Kjo dëshmon se pretendimi që e moshuara e keqtrajtuar fizikisht, e publikuar në video, është serbe, është i pavërtetë
Me gjasë mediat spanjolle janë ndikuar nga dezinformatat e mediave serbe lidhur me identitetin etnik të të moshuarës, të cilat janë trajtuar nga hibrid.info (këtu).
Analiza:
Disa media spanjolle kanë publikuar artikuj lidhur me rastin e dhunimit fizik të një të moshuare në një shtëpi të pleqve në Kosovë, ku pretendojnë se ajo është e komunitetit serb.
Me gjasë mediat spanjolle pretendimin e bazojnë në dezinformatat e bëra nga mediat serbe lidhur me identitetin etnik të viktimës.
Hibrid.info, në bazë të metodologjisë së punës vlerëson se këto pretendime klasifikohen si “manipulim i fakteve”.
Vlerësimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
