Llogaria në TikTok me emrin “lagraqsaqi” ka publikuar një video-material dje (27 shkurt), në të cilin paraqitet imazhi i opinionistit, Halil Matoshi.
Në fotografi, Matoshi shfaqet në një vend, tabela në të cilin tregon për vendbanimin “Kraljevë”, (këtu) më mbishkrimin vendosur nga autori i publikimit që pretendon se opinionisti ka shkuar në Serbi për të marrë pagesën, pas vendimit të Bankës Qendrore të Kosovës (BQK), për ndalimin e qarkullimit të monedhës së Dinarit në Kosovë.
Bazuar në komentet e postuara në seksionin e komenteve, hibrid.info vlerëson se audienca nga ky publikim mund të informohet që Matoshi paguhet nga shteti serb.
Por, pas verifikimit të fakteve nga hibrid.info, është gjetur fotografia reale e opinionistit Halil Matoshi, ku në fakt shfaqet tabela, e cila tregon për vendbanimin “Tugjec” (këtu), gjë e cila fakton ndërhyrjet në imazhin autentik.
Vegëza e video-materialit të publikuar nga llogaria “lagraqsaqi”:
https://www.tiktok.com/@lagraqsaqi/photo/7339867848992492833
Screenshot me komentet në postimin e publikuar në TikTok
Hibrid.info ka hulumtuar me anë të makinave të kërkimit dhe ka gjetur fotografinë e publikuar nga Halil Matoshi, në llogarinë e tij në Facebook, fotografi ku në fakt, shfaqet Matoshi në një vend, tabela në të cilën tregon për lokacionin “Tugjec”, fshat i cili gjendet në komunën e Dardanës (shih këtu).
Analiza:
Një llogari ka ndërhyrë në një imazh të opinionistit Halil Matoshi, duke i vendosur tabelës së vendbanimit të shfaqur në fotografi, emërtimin e qytetit serb, “Kraljevo”.
Hibrid.info ka gjetur fotografinë reale, në të cilin tabela e paraqitur tregon se Matoshi ka publikuar pamjet nga vendbanimi, Tugjec, fshat nga komuna e Dardanës.
Bazuar në metodologjinë e punës, hibrid.info e vlerëson këtë përmbajtje si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.
