Shkroi: Endrit Berisha
Përmes postimeve në disa faqe në Facebook, është rikthyer një lajm i para disa muajve për vdekjen e një 16-vjeçari shqiptar në Itali.
“Lajm i trishtë! Ndërron jetë në aksident futbollisti shqiptar” është titulli që është përdorur nga këto faqe në Facebook në postimet e bëra të enjten (25 prill). Në Facebook këto faqe kanë përdorur fotografi përgjithësuese për të nxitur klikimet.
Përderisa në postimet në Facebook nuk bëhet e ditur se kur ka ndodhur ngjarja, kur të klikohet artikulli në hyrje të tekstit shkruan se “ky lajm ka disa muaj”.
Lajmi në Facebook është shpërndarë nga faqet “Lajme info”, “Gazeta Korekte” dhe “Ilirida News”, me të njëjtin përshkrim e që çojnë në të njëjtin artikull të publikuar nga portali i dyshimtë “belmouth.com”. (shih këtu, këtu dhe këtu)
Vegëza e artikullit të publikuar nga portali i dyshimtë “belmouth.com” që tregon se lajmi është i vjetër:
Pas kontrollit të fakteve nga hibrid.info, rezulton se lajmi ishte raportuar në shtator të vitit të kaluar. Disa mediume në Shqipëri kishin raportuar në javën e dytë të shtatorit se 16-vjeçari shqiptar Gabriel Alibeaj humbi jetën në Itali, pas një aksidenti rrugor. (shih këtu dhe këtu)
Analiza:
Përmes postimeve në Facebook nuk sqarohet se po raportohet për një aksident fatal të para disa muajve.
Për dallim nga postimet në Facebook me tituj e fotografi me synime për të tërhequr audiencën, brenda artikulli tregon se ngjarja ka ndodhur muaj më parë.
Bazuar në metodologjinë e punës, hibrid.info e vlerëson këtë përmbajtje si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
