Llogaria në TikTok që mban emrin “mtrks25” ka publikuar të mërkurën (6 dhjetor) një video-material që shfaq pamjet e një helikopteri.
Këtij video-materiali i është vënë mbishkrimi “Sërish donacion nga Amerika”.
Pas verifikimit të fakteve të kryer nga hibrid.info, është vërtetuar se pretendimi që Shtetet e Bashkuara të Amerikës i kanë dhuruar Kosovës helikopter, është i rremë.
Vegëza e video-materialit të publikuar në TikTok nga llogaria “mtrks25”:
Pas hulumtimit të kryer përmes programit të automatizuar “InVID”, hibrid.info ka gjetur pamjet e helikopterit të njëjtë që shfaqet në videon nga llogaria e lartcekur.
Imazhi i këtij helikopteri është gjetur i publikuar në një artikull të revistës kryesore në gjuhën angleze që fokusohet në çështjet e lidhura me mbrojtjen nga një perspektivë e qartë evropiane “EDRmagazine.eu”. (shih këtu)
Në këtë artikull shkruan rreth flotës së helikopterëve të Forcave të Armatosura Greke.
Vlen të ceket se video-materiali i publikuar në TikTok nga llogaria “mtrks25” aktualisht numëron mbi 37 mijë shikime. (shih fotografinë më poshtë)
Po ashtu hibrid.info ka hulumtuar në faqen në Facebook të Ministrisë së Mbrojtjes, për njoftime në lidhje me këtë pretendim, por nuk është gjetur asnjë konfirmim mbi pretendimin e publikuar. (shih këtu)
Edhe në njoftimet e Ambasadës amerikane në Kosovë, nuk gjejmë lajme që dëshmojnë se Kosovës do t’i dhurohet një donacion i tillë. (shih këtu)
Analiza:
Një llogari në TikTok ka publikuar një video-material, që shfaq pamje të një helikopteri, për të cilin pretendohet se do t’i dhurohet si donacion Kosovës nga SHBA-të.
Por, hibrid.info nuk ka gjetur prova nga burimet zyrtare që mbështesin publikimin e pretenduar.
Andaj edhe bazuar në metodologjinë e punës, hibrid.info vlerëson këtë përmbajtje si “Lajm i rremë”.
Vlerësimi:
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.