Portali i dyshimtë me përmbajtje në gjuhën shqipe “gazetaz.com” dje (26 qershor) ka publikuar një artikull me titull “QEVERlA Kurti vjen me vendim te mrekuIlueshem per skemën sociaIe dhe pensionaIe ja sa para do te ndahen”.
Pas verifikimit të fakteve, hibrid.info ka vërtetuar se titulli i këtij artikulli është i sajuar, ndërsa lajmi është i vjetër.
Në përmbajtje gjendet lajmi i muajit tetor të vitit 2021, atëkohë kur Qeveria e Kosovës kishte miratuar vendimin nga i cili do të përfitonin pagesa shtesë në vlerë prej 100 eurove përfituesit e skemave pensionale për muajin nëntor.
Pra, lajmi është i vjetër, të cilin ky portal i dyshimtë është munduar ta paraqesë si aktual.
Vegëza e artikullit të publikuar në portalin e dyshimtë “gazetaz.com”:
Ky artikull është shpërndarë edhe në Facebook përmes faqes “Specialja”, e cila numëron afër 90 mijë ndjekës. (shih këtu)
Pas hulumtimit të kryer përmes makinave të kërkimi, hibrid.info ka arritur të gjejë artikullin e publikuar nga agjencia turke e lajmeve “Anadolu Agency” në edicionin në gjuhën shqipe, i cituar nga portali i dyshimtë “gazetaz.com”. (shih këtu)
Analiza:
Portali i dyshimtë “gazetaz.com” ka publikuar një vendim të vjetër (tetor 2021) të Qeverisë së Kosovës, e cila atëkohë kishte miratuar shtesa për skemën sociale dhe pensionale.
Ky portal i lartcekur këtë artikull të vjetër është munduar ta paraqesë si aktual, duke pretenduar në titull se “Qeveria Kurti vjen me vendim të mrekullueshëm për skemën sociaIe dhe pensionale”.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” janë ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
