Llogaria në TikTok që mban emrin “gazetalb” ka publikuar dje (27 dhjetor) një video-material me pamje nga momenti i konferencës së ish-presidentit të Kosovës, Hashim Thaçi pas intervistimit nga Prokuroria Speciale në kuadër të Dhomave të Specializuara, në Hagë.
Në video-material është vendosur mbishkrimi që pretendon se ish-presidenti Thaçi do të lirohet në mars të vitit 2024. Thaçi po mbahet në paraburgim për shkak të akuzave për krime lufte nga Prokuroria Speciale e Dhomave të Specializuara, në Hagë.
Pas hulumtimit të kryer nga hibrid.info nuk është gjetur i konfirmuar pretendimi i llogarisë në fjalë, në asnjë nga burimet zyrtare.
Vegëza e video-materialit të publikuar në TikTok nga llogaria “gazetalb” në TikTok:
Hibrid.info ka hulumtuar në ueb-faqen e Dhomave të Specializuara dhe Zyrës së Prokurorit tё Specializuar të Kosovёs.
Në këtë ueb-faqe, më saktësisht në seksionin e emëruar “Lajme/Media”, nga njoftimet e ndara nga ky institucion, nuk është gjetur asnjë i ngjashëm me pretendimin e lartcekur (shih këtu).
Vendimi i fundit sa i përket procesit gjyqësor të Hashim Thaçit në Hagë, është gjetur i publikuar nga hibrid.info, në artikujt e disa mediave në gjuhën shqipe (14 dhjetor) (shih këtu dhe këtu).
Në raport tregohet se Gjykata Speciale ka marrë vendim për vazhdimin e paraburgimit për ish-presidentin Hashim Thaçi, dhe ish-kryeparlamentarin, Kadri Veseli si dhe po ashtu nuk qartësohet kohëzgjatja e këtij procesi gjyqësor.
Analiza:
Një llogari në TikTok ka publikuar një video-material me anë të cilit pretendohet se ish-presidenti Hashim Thaçi, do të lirohet në mars të vitit 2024.
Pas verifikimit nga hibrid.info, nuk janë gjetur burime zyrtare që konfirmojnë pretendimin e publikuar.
Bazuar në metodologjinë e punës. hibrid.info e vlerëson këtë përmbajtje si, “Lajm i rremë”.
Arsyetimi:
Vlerësimin “Lajm i rremë” e marrin ato raportime mediatike që janë tërësisht prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.