Dezinformatat
Dezinformatat e publikuara këtë javë kanë përmbajtur temat e rritjes së çmimeve, pensioneve dhe tërheqjes së trustit, dhe interpretimeve dezinformuese të mediave serbe.
Portali i dyshimtë me përmbajtje në gjuhën shqipe “web3.lajme.icu” më 30 gusht ka publikuar një artikull me titull “Nga muaji shtator rritet pensioni, Ja sa eshte vlera e rritjes”.
Hibrid.info pas hulumtimit të kryer përmes makinave online të kërkimit, ka arritur të vërtetoj se lajmi është i vjetër, i muajit mars, i publikuar nga portali informativ “Panorama.com.al” e që ka të bëjë me rritjen e pensioneve në Shqipëri nga muaji prill.
Portali i dyshimtë me përmbajtje në gjuhën shqipe “on27.net” më 29 gusht ka publikuar një artikull me titull “Lɑjmet e kqijɑ s’kɑne te ndɑluг , ггiten peгseгi pгoduktet bɑze ushqimoгe ne Kosove”.
Pas kontrollit të fakteve të paraqitura në këtë artikull, hibrid.info ka vërtetuar se titulli është i rremë dhe nuk përputhet me përmbajtjen. Pra, pretendimi është i rremë se janë rritur çmimet për produktet bazë ushqimore, siç pretendohet në titull.
Artikulli me titull “Lajm I Mire Nga Trusti / Te gjithe qytetaret e Republikes se Kosoves kane te drejte te terheqin mjetet e tyre prej Trusti”, është publikuar më 2 shtator nga portali i dyshimtë me përmbajtje në gjuhën shqipe “web3.lajme.icu”.
Pas verifikimit të fakteve nga hibrid.info, është vërtetuar se artikulli përmban titull të sajuar, i cili nuk i përgjigjet përmbajtjes. hibrid.info e ka vlerësuar këtë artikull si “Dezinformatë”.
E përditshmja serbe “Novosti” në ueb-faqen e saj “Novosti.rs” ka publikuar artikullin ku pretendohet se shtetin e Kosovës nuk e kanë njohur 103 nga gjithsej 193 shtete të botës. Gazeta i referohet deklaratave të presidentit të Serbisë, Aleksandër Vuçiq, i cili theksoi se në “sirtarin e tij gjenden dokumentacioni për shtatë shteteve për tërheqje të njohjes së Kosovës”.
Përkundër faktit që numri i shteteve që kanë njohur Kosovën është përcjellë edhe me paqartësi, për shkak se disa shtete kanë qenë të paqarta në vendimin e tyre të njohjes, hibrid.info vlerëson se pretendimi i gazetës është dezinformatë.
E përditshmja serbe “Politika.rs” më 2 shtator ka publikuar një artikull në lidhje me ndërrimin e targave për serbët e Kosovës, ku hedh pretendime dezinformuese duke interpretuar video-postimin e kryeministrit të Kosovës, Albin Kurti, i cili cek mundësinë e lirimit nga taksat dhe detyrimet tjera (deri në 5000 euro) për ata që i ndërrojnë targat brenda dy muajve, e që gazeta e interpreton si gjobë ndaj serbëve.
Mundësinë e ofruar nga Kurti për lirim nga taksat dhe detyrimet tjera e që mund të kapin vlerën prej 5000 euro, e përditshmja serbe e interpreton pavend si kërcënim me gjobë për serbët. Në bazë të metodologjisë së punës, hibrid.info vlerëson së pretendimet e të përditshmes serbe “Politika.rs” janë “dezinformatë”.
Mashtrime
Edhe këtë javë nuk kanë munguar artikuj mashtrues në lidhje me shitblerje të vetura dhe banesave të ndryshme.
Portali i dyshimtë “web3.lajme.icu” më 1 shtator ka publikuar fotografinë e një veture të markës Mercedes-Benz, duke pretenduar se ajo është në shitje për një çmim 2450 euro.
Pas hulumtimit të kryer nga hibrid.info, është vërtetuar se fotografitë e kësaj veture janë publikuar para dy vitesh në një ueb-faqe me emrin “Drive2.com”, ndërsa vetura mban tabela të shtetit të Bjellorusisë.
Bazuar në metodologjinë e punës, hibrid.info e vlerëson këtë artikull si “Mashtrim”.
Portali i dyshimtë me përmbajtje në gjuhën shqipe “web3.lajme.icu” më 31 gusht ka publikuar një shpallje të rreme për shitjen e një banese me çmim jo real. Pas hulumtimit të kryer përmes makinave online të kërkimit, hibrid.info ka arritur të vërtetojë se fotografia dhe përmbajtja nuk përputhen me njëra tjetrën. Pra, nuk bëhet fjalë për apartamentin që shihet në imazh.
Pas verifikimit të fakteve të kryer nga hibrid.info, ky artikull me këtë shpallje merr vlerësimin si “Mashtrim”.
Clickbait
Clickbait artikujt përmblidhen në temat që kanë të bëjnë me ndihme financiare të familjeve në Gjermani, ndarjes parash për qytetarët dhe ndryshim moshe të pensionimit.
Portali i dyshimtë me përmbajtje në gjuhën shqipe “web3.lajme.icu” më 2 shtator ka publikuar një artikull me titull “Ndahen ndihmë nga 300 Euro për secilën familja që ka 2 ose më shumë fëmijë”.
Pas verifikimit të fakteve të kryer nga hibrid.info është vërtetuar se lajmi është i vjetër (qershor 2020), atëkohë kur Gjermania kishte publikuar detaje të pakos stimuluese prej 130 miliardë eurosh, që përfshinin shtesat prej 300 euro për fëmijë.
Portali i dyshimtë me përmbajtje në gjuhën shqipe “specialja.com” më 1 shtator ka publikuar një artikull me titull “Ndihmë financiare nga 300 euro për çdo qytetar”.
Pas verifikimit të fakteve, hibrid.info ka vërtetuar se titulli është përgjithësues, duke mos e bërë të qartë se autoritetet e cilit vend kanë marrë një vendim të tillë. Pas kontrollit të fakteve bazuar në metodologjinë e punës, hibrid.info e vlerëson këtë artikull si “clickbait”.
Portali i dyshimtë “specialja.com” më 1 shtator ka publikuar një artikull me titull “Ka Ndryshuar Mosha E Pensionit : Ja Sa Vjeç Do Te DaIin Tani Burrat Dhe Grate”.
Nga kontrolli i fakteve i kryer nga hibrid.info, është vërtetuar se ky lajm është i vjetër, i cili u publikua në janar të vitit 2020 dhe ka të bëjë me pensionistët e Shqipërisë. Pas analizës së kontrollit të fakteve të kryer nga hibrid.info, ky artikull merr vlerësimin si “clickbait”.
Lajm i rremë dhe teori konspirative
Gjatë javës kemi pas lajm të rremë se Kurti kishte plan për luftë, teori konspirative se Perëndimi po nxit luftë fetare në Kosovë.
Në ballinën e gazetës serbe “Informer” është publikuar më 30 gusht kryeartikulli me titull “Kurti ka marrë fund”. Artikulli i kësaj të përditshme pretendon se Albin Kurti ka shpallur zgjedhje të reja për shkak që, siç thuhet, nuk ka marrë përkrahjen e SHBA-së, NATO-s, BE-së dhe, siç pretendon gazeta, as të Tiranës për planet e tij për luftë.
Hibrid.info vlerëson që pretendimet se Kurti ka pasur plane lufte dhe se ka shpallur zgjedhjet e reja për shkak se të gjithë ishin kundër këtij plani, është i sajuar tërësisht dhe si i tillë, merr vlerësimin “lajm i rremë”.
Mediumi serb “Alo.rs!” më 02 shtator ka publikuar një artikull me titull “ALO! ZBULON: PARALAJMËRIMI DRAMATIK I UDHËHEQËSVE ISLAMË DHE ORTODOKSË Perëndimi po shkakton luftë fetare në Kosovë!”, në të cilën pretendohet pa fakte se perëndimi po shkakton luftë fetare në Kosovë duke u diskriminuar komuniteti serb.
Hibrid.info në bazë të metodologjisë vlerëson se këto pretendime klasifikohen si “teori konspirative”.
